Dul-an P1M shabu nasakmit, pusher napusilan

CEBU, Philippines - Samdan ang usa ka gidudahang tigpayuhot og drugas human nakigpinusilay sa kapulisan ug nasikop ‘sab ang iyang sinaligan pagronda sa mga sakop sa Regional Anti-Illegal Drugs Special Operations Group-7 sa Purok 3, Barangay Malhiao lungsod sa Badian kagahapon sa buntag.

Ang naangol naila nga si Erwin “Noynoy” Rojas nga mao’y target sa kapulisan ug gihulagway nga usa ka level 2 drug pusher. Samtang nasikop ang iyang batabata nga si Joey Español, 23.

Matud pa ni Senior Inspector Joey Bicoy, team leader sa RAIDSOTG-7 nga nahinabi sa Banat News duha ka semana nilang gipanid-an si Rojas una pa nila gihimo ang operasyon. Gamit ang P10,000 nga budol money nakapalit ang asset sa kapulisan og usa ka daku nga putos sa gituohang shabu hinungdan nga kini gisikop, apan sumala pa ni Bicoy sa ilang pagduol miibot  sa iyang armas kalibre .45 si Rojas ug gipusil ang mga polis.

Way naigo sa mga polis  hinungdan nga sila mibawos ug naigo kini sa tiil ug human nadisarmahan gidala siya sa Badian District Hospital ug gibalhin sa Vicente Sotto Memorial Medical Center.

Sulod sa balay ni Rojas nasakmit sa kapulisan ang usa ka dakong putos, walo ka medium size ug 19 ka gagmay nga pakete nga pulos dunay sud nga gituohang shabu nga mikantidad og P826,000.

Lakip sa narekober sa kapulisan ang salaping cash kantidad P2,050 nga gituohang halin sa ilegal nga drugas ug ang usa ka .45 caliber pistol nga dunay magazine nga duna’y tulo ka bala ug usa ka basiyo.

Samtang nadakpan usab sila si  Ricardo Belcenio Terol, 42 ug ang manag-agaw nga sila si  Ares  Baguio  Tura, 35, ug Mariter Tura, 31, diha sa Barangay Buagsong, Cordova human nasakmitan og unom ka paketeng shabu ug .357 rebolber nga dunay mga bala.

Nadakpan usab sa laing operasyon si Brian Igot, 27, residente sa Sitio Ibabao, Barangay Agus sa Lapu-Lapu City ug nakuhaan og 15-ka paketeng shabu ug laing upat ka medium size niini.

Nadakpan usab ang usa ka Mikki Jugalbot, 22, samtang nakaikyas si Lone Escoral Libotlibot sa operasyon sa kapolisan sa Liloan diha sa Purok Molave, Barangay Tayud, nakuha sa operasyon ang usa ka dakong pakete ug duha ka gamay nga paketeng dunay sud nga shabu ug usa ka video karera.(Jojo Ugdol ug report nila ni Christell Fatima Tudtud ug Romeo Limpangog/EIM)(BANAT NEWS)