Upat ka pushers nasikop

CEBU, Philippines – Nasikop ang upat ka pushers sa managlahing buy-bust operations sa kapolisan sa dakbayan sa Sugbo sa niaging gabii.

Una’ng nasikop sa San Nicolas Police ang 23-anyos nga si Daniel Laurenciana sa A. Lopez Street, Calamba.

Usa ka gamay nga pakete sa drugas ang una’ng napalit sa kapolisan sa suspek hinungdan nga kini gisikop. Nakuha sa kapolisan gikan sa posesyon ni Laurenciana ang 27 ka gagmay nga pakete sa gituohang drugas.

Samtang tulo ka lalaki ang nasikop sa gihimo’ng buy-bust operation sa mga sakop sa City Intelligence Branch sa sitio San Miguel, Apas pasado alas 8 sa nakalabay nga gabii.

Ang mga dinakpan naila nga sila si Madie Parreño, 28, ulitawo nga mao’y target sa kapolisan; Alexander Macap, 21 ug Roger Hiba, 28, nga taga sitio Mahayahay sa maong barangay.

Matud ni Supt. Romeo Santander, hepe sa CIB, nga nakadawat sila og impormasyon gikan sa mga nagpuyo sa lugar may labot sa ilegal nga kalihukan ni Parreño.

Sumala pa ni Santander nga ila gipaningkamutan nga masikop si Parreño human sila nasayud nga kini namaligya og drugas duol sa usa ka tunghaan sa maong lugar ug gihulagway nga usa ka level 3 drug pusher.

Kantidad nga P300 ang gigamit sa pagpalit sa usa ka gamay nga pakete sa shabu atol sa buy-bust operation sa kapolisan.

Sa pagsikop kang Parreño narekober ang 12 ka gagmay nga pakete sa gituohang drugas.

Apan sa pagsubay sa kapolisan sa sulod sa balay nga gipundohan sa suspek naabtan sila si Macap ug Hibanga nga nag-andam na unta og mga paraphernalia aron pagsuyop apan dali sab sila nga gisikop. – /GMR) (BANAT NEWS)