Nangawat apan nakatulog

CEBU, Philippines – Nangawat sa usa ka tindahan, nakatulog unya naabtan sa tag-iya didto sa Barangay Sta. Cruz, lungsod sa Balamban.

Ang kapolisan miingon nga abtik kaayo’ng nakadagan ang kawatan dala ang kuwarta nga iyang nakawat apan posible’ng mailhan siya kay adunay pitaka nga may ID nga nahabilin.

Matud ni SPO1 Jose Villarin, ang chief investigator sa Balamban Police Station, nga lakip ‘sab sa nabilin sa suspetsado ang iyang cellphone ug holster sa armas didto sa tindahan ni Jennelyn      Ho.

Nasayran nga ang tigbantay sa tindahan mag-init na unta og tubig ug misulod sa usa ka lawak kilid sa tindahan diha’ng iyang nasigpatan nga nagkatag ang mga butang sa tindahan.

Gipanghipos sa katabang sa balay ni Ho ang mga nagkatag nga butang diha’ng iyang nasigpatan ang tawo nga kalit lang mibangon gikan sa iyang gihigdaan.

Unang gipangutana sa maong lalaki ngadto sa katabang nga si Rufina Lapay kun asa gitagoan ang kuwarta sa ilang agalon. Si Lapay gitionan og armas ug gidala sa kawatan ngadto sa usa ka lawak.

Ang laing katabang nga si Mary Cris Bacaron, 23, nakit-an sa kawatan ug giapil sa pag-padlock sa kuwarto apan ang bana ni Bacaron nakakita ug midagan palayo.

Sa kahadlok sa kawatan, dali kini nga misibat gikan sa balay apan nahabilin ang mga butang nga mogiya sa kapolisan aron siya mailhan.

Base sa imbestigasyon nasayran nga ang asawa sa maong kawatan nagtrabaho diay kaniadto sa tindahan. Base sa ID, ang kapolisan mopasaka kaniya og kaso. – /RUB) (BANAT NEWS)