Nurse top 1 sa police promotion

CEBU, Philippines - Nahimong first placer ang kanhi nurse sa National Police Commission Promotional Examination for Senior Police Officers nga gipahigayun niadtong Nobiyembre 9, 2014.

Si Police Officer 1 Junimark Ungab, usa ka registered nurse ug nadestino sa Homicide Section sa Cebu City Police Office, nakakuha sa unang dapit ug may average nga 82.50% samtang ang nagsunod ni Ungab nakakuha og 80.52%.

Matud ni Ungab nga wala gyud siya magtuo nga makab-ot niya nga ma-first placer siya sa maong exam, apan ampo niya nga makapasar siya. Sumala pa ni Ungab nga nisulod siya sa pagka-polis human sa duha ka tuig isip nurse.

Matud niya nga damgo sab ni niya ug gisunod ang iyang amahan nga usa sab ka polis. Dugang niya nga sa bata pa lang siya damgo na gyud niya nga mag-polis apan kurso nga nursing ang gipakuha kaniya.

Bisan pa man niini, gipaninguha gihapon niya nga matapos niya ang kurso ug nahimo gyud siya nga registered nurse.

Nagpasalamat si Ungab sa iyang mga ginikanan ug kaubanan sa homicide section sa CCPO nga hugot kaayo ang suporta kaniya.  (BANAT NEWS)