Dugang barangay seryoso sa ilegal nga drugas
CEBU, Philippines - Dugang lista sa mga barangay ang iduso sa Police Regional Office-7 ngadto sa Department of Interior and Local Government nga seryosong apektado sa ilegal nga drugas.
Si PRO-7 Director Prudencio Tom Bañas miingon nga nagpaabot siya sa suwat sa DILG aron masusi kun unsa nga mga barangay sa Sugbo ang wala nalista sa Philippine Drug Enforcement Agency.
Matud ni Bañas nga ang mga barangay nga wala naapil sa lista, iya kining irekomendar ngadto sa DILG.
“I will look into it, yun naman ang aming battlecry when I assumed the office as regional director,” sigun pa ni Bañas.
Usa sab sa gusto nga masayran sa opisyal kun naa ba’y mga barangay nga naapil sa listahan sa PDEA nga dili problemado sa drugas nga nabutang o duna’y dapat ibutang sa listahan.
Plano ni Bañas nga pakigtagboan ang mga opisyal sa Barangay Anti-Drug Abuse Council (BADAC) kinsa may kapasidad sa pag- determinar kung unsa ka seryoso ang problema sa drugas sa ilang lugar.
Sa suwat ni DILG Sec. Mar Roxas ngadto kang Cebu City Mayor Michael Rama, 13 ka barangay sa dakbayan ang giingong seryoso ang problema sa drugas.
Kini naglakip sa Mabolo, Camputhaw, Lorega, T. Padilla, Kamagayan, Calamba, Labangon, San Nicolas, Duljo Fatima, Sawang Calero, Suba, Ermita ug Basak Mambaling.
Ang barangay Pasil ug Pulangbato nga notado sa ilegal nga drugas ang wala naapil sa listahan.
Apan gipadayag sa hepe sa City Intelligence Branch, Supt. Romeo Santander, nga bisan wala sa listahan sa PDEA, kanunay sila nga mihimo og operasyon batok ilegal nga drugas sa usa ka lugar. (Jojo C. Ugdol/GMR)(BANAT NEWS)
- Latest
