Duha ka hapon gikilkilan
CEBU, Philippines - Sikop ang duha ka lalaki nga misuway pagpangilkil sa duha ka Hapon kagahapong adlawa sa may Archbishop Reyes Avenue, Kamputhaw, dakbayan sa Sugbo.
Giila ang mga nadakpan nga sila si Roldan Abrogenia, 29, taga Ramos-Jakosalem ug Jake Bermas, 20, taga Banawa.
Ang biktima naila nga sila si Inagaki Kazuki, 22 ug Nobuta Yu, 21, taga Kanagawa, Japan ug kasamtangang nagpuyo sa usa ka hotel sa Kamputhaw.
Ang Tourist Police ang mihimo sa usa ka entrapment operation sa duha ka suspek human nagpatabang sa kapolisan ang duha ka langyaw.
Matud pa nga unang gipangkawatan ang duha ka langyaw ug nakuha ang usa ka cellphone ug usa ka relo.
Sumala pa nga usa sa mga dinakpan ang mitawag sa mga langyaw aron mangayo og salapi bugti sa cellphone ug relo.
Wala na’y nahimo ang duha ka suspek human daling gisignit sa kapolisan ug nabawi ang mga butang nga nakawat.
Sa pagsubay sa kapolisan nakuhaan pa ang mga suspek og usa ka stick sa marijuana, usa ka putol nga aluminum foil ug lighter. Gitanggong na sa kapolisan ang duha ka suspek nga pasakaan sa tukmang kaso. (BANAT NEWS)
- Latest
