May posas gitabangan pagpusil

CEBU, Philippines - Patay ang usa ka 33- anyos nga lalaki human kini gipusil sa duha ka lalaki samtang kini giposasan diha sa Panganiban Bridge, Sanciangko Street, Cebu City niadtong Domingo sa hapon. Si Joven Maranga nga lumad nga taga Banlot, Sibonga, nakita sa mga tawo nga midagan nga nakabinaklid sa posas nga gigukod sa unom ka mga lalaki, upat niini nagsakay og motorsiklo, duha ang nagsunod og dagan nga mipusil kaniya.

Matud pa ni SPO1 Ruth Violango sa Homicide Section sa Cebu City Police Office nga nahinabi sa Banat News nga posibleng personal nga bikil ang motibo sa maong pagpamusil.

Gitug-an ni Violango nga sa nakuha nila nga impormasyon nga niadtong nakalabay nga adlaw mitug-an ang biktima sa iyang inahan nga dili motug-an kon dunay mangita kaniya.

Igo sa liog ug duha ka igo sa dughan ang naangkon sa biktima, nga dali pa unta nga gidala sa Cebu City Medical Center (CCMC) apan nakabsan gayod kini sa iyang kinabuhi. Gisubay sa kapulisan kung asa gikan ang biktima nga duna man kini posas ug gidudahang gitanggong kini sa usa ka balay apan nakaeskapo.

Nakuha sa kapulisan sa crime scene ang tulo ka basiyo sa kalibre .40 ug usa ka basiyo sa .9mm. - /EIM) (BANAT NEWS)