Abangan sa stalls gipaminusan
CEBU, Philippines - Gikunhuran karon ang abangan sa mga puwesto sa merkado publiko sa dakbayan sa Mandaue.
Gipahibawo ni Musoline Suliva, market administrator, nga P30 lang ang gikolektang abangan sa matag adlaw sa mga manindahay nga nagpahimutang sa temporary nga puwesto.
Sa wala pa maguba sa linog ang merkado, abangan nga P60 ngadto sa P80 ang gikolekta.
Matud ni Suliva nga mikunhod hinuon ang gidaghanon sa mga naninda sa merkado publiko sa pagkakaron itandi sa wala pa maguba sa 7.2 magnitude nga linog ang edipisyo sa bag-ong merkado publiko.
Si Suliva miingon nga ang gidaghanon sa mga nag-okupar og puwesto sa wala maguba ang merkado mokabat sa 1,200 ug nahimo na lang kining 900 ka manindahay sa pagkakaron.
Ang 300 ka mga manindahay nga wala pa mobalik sa ilang pagpaninda maoy ilang gipaabot ang katukuran sa bag-ong merkado nga ibalik sa nasunugan luyo sa National Shrine sa Saint Joseph nga gikatakdang sugdan karong Nobiyembre. (BANAT NEWS)
- Latest
