CEBU, Philippines - Sa dihang gitukod ni Hall of Fame sportsman Antonio ‘Bidoy’ L. Aldeguer ang ALA Boxing Gym niadtong tuig 1986, tuyo lamang niya mao ang pagbansay sa mga bata gikan sa mga pobreng pamilya aron mamahimong amateur fighters.
Tulo ka dekada ang milabay, wala niya damha nga motubo ang iyang gym ngadto sa labing daku nga boxing stable sa nasud ug tighulma sa labing maayo nga amateur ug professional champions sud sa ring. Gawas niini, sila sab maoy nagpasundayag og world-class boxing dinhi ug gawas sa nasud timaan sa dili hitupngan nga kalampusan sa ilang Pinoy Pride series.
Mao kana ang natagamtaman nga kampusan sa ALA Boxing nga sa dili matawag nga dakung garbo alang ni Aldeguer.
Sud sa pipila ka mga tuig nga pagsakripisyo, panglimbasog ug mga kalisdanan, ang ALA Boxing nakamugna na karon og tulo ka world boxing champions.
Una sa listahan mao si Donnie ‘Ahas’ Nietes, nga maoy labing unang world champion sa ALA Stable human gipilde niini si Thai Pornsawan Porpramook aron pag-sakmit sa WBO minimumweight title niadtong Septiyembre 30, 2007 diha sa Waterfront-Cebu City Hotel and Casino.
Labaw pa niana ang nakab-ot sa ALA Boxing gumikan kay si Nietes milahutay. Gani gibuak pa niini ang rekord sa tinamod nga si Gabriel ‘Flash’ Elorde isip longest reigning Filipino world boxing champion ug dayon nahimong three-division world champion bugti sa labing uwahi niyang daog batok ni Thai Komgrich Nantapech nga nagkorona kaniyang IBF flyweight king.
Sa tunga-tungang bahin sa paghari ni Nietes, gibayaw ni Merlito ‘Tiger’ Sabillo ang ALA Gym ngadto sa himaya human iyang gipakamang ang Mehikanong si Jorle Estrada aron pagbira sa WBO minimumweight title niadtong Hulyo 13, 2013 didto sa Solaire Resort Hotel and Casino sa Pasay City. Wala hinuon magdugay sa iyang trono si Sabillo human siya gitumba ni Francisco Rodriguez sa ikaduha pa lamang niyang padepensa.
Karon naabot si Milan ‘El Metodico’ Melindo.
Human sa duha ka kapakyasan, si Melindo mipakita og tumang kadasig ug determinasyon aron kab-oton ang iyang damgo sa makakurat nga pamaagi.
Ang garbo sa Cagayan de Oro City mipalukapa ni defending Japanese champion Akira Yaegashi sa tulo ka sunod-sunod nga higayon aron pagkulit og makapakugang nga kadaugan pinaagi sa TKO sa oras nga 2:45 sa unang hugna ug ingon man pagdaog sa IBF light flyweight belt niadtong Domingo didto sa Ariake Coliseum in Tokyo, Japan.
“I am very, very happy for him (Melindo). I can’t say anything,” matud pa ni Aldeguer nga nasurprisa human masayod nga usa lamang ka hugna gitapos ni Melindo ang away.
Taliwala sa naglagiting nga kalampusan nga ilang naangkon daw wala na’y angayan pa nga iprobar ang ALA Boxing, apan si Aldeguer nagkanayon nga duna pa sila’y misyon nga pagabuhaton. (BANAT NEWS)