Pila ka oras nga nagpaabot ang mga biktima sa sunog sa Barangay Ermita sa Dakbayan sa Sugbo. Pila ka oras nang naandam ang family packs nga dunay unom ka kilong bugas humay, walo ka sachets sa kape, walo ka putos nga noodles, ug tag-tulo ka lata sa sardinas ug corned beef sa Department of Social Welfare and Development (DSWD).
Sayong buntag pang nagtapok ang mga representante sa nasunogan nga mga pamilya. Hapit na lang tigpaniudto wa pay timaan kanus-a i-apud-apod ang hinabang. Rason sa kalangay? Wa pang grupo sa gipaabot nga senador.
* * *
Wa pa igkita ang senador pero bantang sa tibuok venue ang tarpaulins nga naghuot sa iyang nawong. Sige sang singgaak ang trumpa sa iyang ngan. Nagpuli-puli sa mikropono ang mga tagduma sa pagpasalig nga hapit na siya moabot. Gisabot sang daan ang mga nanambong nga kinahanglang mamakpak inig abot sa senador.
Samtang nagpaabot sila, mahimo bang mag-praktis na og pakpak? Kay ang senador labing suod sa presidente. Kon makumbinser sa kadasig sa paghangop niya, makumbinser ang Malacañang paghatod og dugang tabang. Mahimong makabarug dayon ang naugdaw nga kabalayan.
* * *
Tuod man, pag-abot sa senador puwerteng abiba sa mga biktima. Kuwang na lang nga ila siyang ibayaw nga mao ang bag-ong manluluwas. Pero di pa mahatag ang mga hinabang. Kinahanglan pa silang magpadayong paghuwat. Kay gipa-diskurso pang espesyal nga bisita.
Niangkon sa iyang mensahe nga maoy responsable sa tabang. Hinikalimtan nga trabaho sa DSWD ang pagtabang sa mga biktima. Hinikalimtan nga ang hinabang gikan sa mga magbubuhis. Nga naglakip sa mga biktimang gipahuwat og siyam-siyam.
* * *
Nahitabo kadto pila ka tuig nang nilabay. Ubos sa napulihan nang pamunoan. Sa bag-ong administrasyon, duna nay bag-ong mga hawod ug bag-ong mga lagda. Ang senador gidid-an na pagbutang sa iyang tarpaulins, wa na imbitaha sa relief distribution sa DSWD ug bisan nitunga wa na padiskursoha.
Dihang niatubang ang kadagkoan sa DSWD sa Senado niadtong Miyerkules, iya silang gisabonan. Gipasanginlan ang bag-ong liderato nga namolitika. Puno sa kaikog ang panghimakak sa taga DSWD. Way nangahas paghisgot nga di na siya sikit sa luwag. Mahimo ganing gikontrahan na sa Malacañang. Pero posibleng gimingaw lang ang senador sa ulug-ulog nga abiba.