Sa di pa maglinya para sa tubig
Ang pasidaan sa Metro Cebu Water District (MCWD) nga nitidlom na ang inadlaw nga suplay nga nakuha gikan sa ilang mga tinubdan sa tubig ug ang pag-angkon sa Cebu City Hall nga nagsugod na sila og rasyon og tubig sa pipila ka barangay maoy pahinumdom nato nga ang awhag sa pagdaginot og tubig di slogan ra.
Kinahanglan tang mo-iban sa atong konsumo sa tubig sa di pa mobalik og linya bitbit ang mga balde para sa inadlaw natong panginahanglan sa tubig sa pipila na lang ka tinubdan duol sa atong mga pinuy-anan nga nakalahutay sa grabeng kainit ug kakuwang sa uwan.
* * *
Maong nangahas ko og lista (inabagan sa ChatGPT) sa napamatud-an nga epektibong mga giya sa pagdaginot og tubig sa nagkalainlaing kanasuran nga nahiagom og huwaw:
Tapaki dayon ang tanang buslot sa mga tubo sa imong pinuy-anan; palit og low-flow nga mga gripo nga makaiban sa imong konsumo og hangtod sa 40%; pawongan ang gripo kon mag-toothbrush o mamarbas; gamit og kabo kon manghunaw imbes nga paagason ang gripo;
* * *
Ayaw palapasa og lima ka minuto ang pag-shower (mas daginot pa gyod ang pagpalaban sa kabo ug balde); pawonga ang shower kon manabon ug mag-shampoo; gamita lang ang dishwasher ug washing machine kon puno;
Gamit og silhig imbes pasiritan og hose ang mga layang dahon sa palibot; gamit og balde imbes hose sa paghugas sa sakyanan; dad-a ang sakyanan sa car wash kay sa mahurot ang inyong tubig sa balay; pagtaod og sandayong ug tangke aron pagkolekta sa uwan nga magamit sa pagbubo sa tanom;
* * *
Ila-ilaha ang mga tanom nga makalahutay og huwaw; ayaw pasobrahi og bubo ang mga tanom, gamit og soil moisture meter aron mahibaw-an kanus-a kinahanglan nga mamisbis; taboni ang yuta palibot sa mga tanom aron di dayon mauga; gamit og spray bottle imbes hose sa pagpasirit sa gagmayng mga tanom;
Ayaw pasagdi nga mag-agas ang gripo samtang manghugas sa mga plato, kutsara ug tinidor; gamit og balde pagsawod aron magamit pagbalik ang tubig nga ihugas sa mga prutas ug tanon; ug hisgoti ninyo sa pamilya ug mga silingan ang ka-importante ug uban pa nga mamugnaon nga mga paagi sa pagdaginot sa tubig.
- Latest
