^

Opinion

Lang-og nga tradisyon sa pamilya

ARANGKADA - Leo Lastimosa - The Freeman

Kon nakugang ka sa kadaghan sa mga paryente ni Presidente Ferdinand Marcos Jr. nga naghupot sa dagkong puwesto sa gobyerno, angay kang pahinumdoman nga ang ilang pamilya naghigwaos og kapin sa tulo ka dekada sa pagbalik sa Malacañang. Mao na nga, karon nga sila nay nagtungkawo sa gahom, wa sila mag-usik og panahon.

Kon nituo ka sa pagdili sa mga balaod sa politikanhong mga dinastiya ug nepotismo, hinaot nga nakamatngon na karon nga ang mga Marcos di motuo og way paryentehay. Mas ganahang nihimo sa ilang administrasyon nga way ikogay.

***

Wa mabatasan sa mga Marcos ang pagpadaplin:

• Iyang asawa, Liza Araneta Marcos, gipasanginlang nanghilabot sa pagtudlo sa mga opisyal sa administrasyon;

• Iyang kamaguwangang anak, Sandro, maoy House Deputy Majority Leader (ug kanunay niyang gitangkil sa mga biyahe sa ubang kanasuran kuyog sa iyang ig-agaw, House Speaker Martin Romualdez, ug bayaw, Kongresista Yedda Romualdez);

• Iyang kamanghorang anak nga si Vinny maoy special assistant sa House speaker;

• Iyang maguwang nga si Imee maoy usa sa labing sabaan nga lider sa Senado; ug

• Iyang ig-agaw, Babe Romualdez, maoy Philippine ambassador to the US.

***

Si Marcos Jr. igo lang nipadayon sa lang-og nga tradisyon sa ilang pamilya nga gipalambo sa iyang amahang diktador, Ferdinand Marcos Sr.:

• Gihatagan ang iyang asawa, Imelda, sa daghang puwesto sa gobyerno (human nabistong iyang pagpangabit sa artistang si Dovie Beams), apil nang pagka gobernador sa Metro Manila, ministro sa Human Settlements, assemblywoman sa Interim Batasang Pambansa, ug special envoy sa nagkalainlaing kanasuran, apil na sa Cuba, Libya, China, ug Estados Unidos;

• Iyang kamaguwangang anak, Imee, nahimong pangu sa Kabataang Barangay ug assemblywoman sa Batasang Pambansa;

***

• Iyang ikaduhang anak, Ferdinand Jr., nahimong bise gobernador ug dayon gobernador sa Ilocos Norte ug board chairman sa Philippine Communications Satellite Corp. (Philcomsat) nga way klarong trabaho pero makalilisang ang suweldo;

• Iyang igsuon, Elizabeth Marcos-Keon, nahimo sab nga gobernador sa Ilocos Norte;

• Iyang igsuon, Fortuna Marcos Barba, gipasanginlan nga nabuhong sa higante nga logging concessions sa gobyerno; ug

• Iyang bugtong igsuon nga lalaki, Pacifico Marcos, nahimong pangu sa Philippine Medical Care Commission (Medicare), ang karaang bersiyon sa Philippine Health Insurance Corp. (PhilHealth).

vuukle comment

FERDINAND MARCOS JR.

Philstar
x
  • Latest
Latest
Latest
abtest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

Get Updated:

Signup for the News Round now

FORGOT PASSWORD?
SIGN IN
or sign in with