Unsay mahimo sa imong boto
Kon modaog silang Bise Presidente Leni Robredo ug Senador Kiko Pangilinan karong Mayo 9, di mapalambo dayon ang Pilipinas. Pero may manimon na sa saktong direksiyon; di mawagtang dayon ang pangurakot, pero masugdan na og badlong; di mahaw-as dayon ang mga kabos, pero di na sila kawatan ug pahimuslan.
Sa pagbotar nilang Leni ug Kiko, sa yanong pag-shade sa mga blangko tungod sa ilang mga ngan sa balota, mapahunong ang mga eskandalo, pataka ug pangabuso nga nahiagoman, ug pugos nga gidawat tungod sa kahadlok ug pagkabuak-buak, sa niaging unom ka tuig:
* * *
• Laktod nga pinatyanay sa kampanya sa drugas, apil ang inosenteng mga bata ug mayoriya ang mga kabos nga way ikapanagang ug kansang mga tagtungod di kapangayo og hustisya;
• Paglingiw sa bantang nga mga operasyon sa kinadak-ang drug lords nga padayong nipayuhot og tinonelada nga shabu ug ubang ilegal nga drugas gikan sa ubang kanasuran;
• Pagpanggukod, pagpanghasi, pagpananom og pekeng mga ebidensiya ug pagpangyatak sa tawhanong katungod sa mga nangahas pagsukwahi sa bakak nga mga propaganda sa administrasyon;
* * *
• Palusot sa mga duol sa luwag nga nag-ilogay sa mga komisyon sa higanteng mga proyekto ug bisan ang binilyon ka pesos nga mga transaksiyon sa labing dinalian nga mga panginahanglan sa pandemya;
• Paka-aron-ingnon nga pagbungkag sa oligarkiya aron pagtakli sa tanang pabor ngadto sa mga alyado sa administrasyon nga karon mao nay nanghawod sa labing buhong nga mga natad sa negosyo;
• Pagkontrolar sa mga alyado sa administrasyon sa pinatuyangan nga smuggling sa lana, bugas, isda, utanon, lamas, sigarilyo, ug luhong mga sakyanan sa kinadak-ang mga pantalan, apil na sa Sugbo;
• Pagbangkarota sa nasudnong ekonomiya pinaagi sa pataka nga pangutang ug pagwaldas sa buhis sa katawhan;
* * *
• Pagkakak sa mga panghasi sa China batok sa atong mga mangingisda ug kasundalohan sa atong teritoryo sa West Philippine Sea;
• Makauuwaw nga pagnudnod sa nasud ug katawhang Pilipinhon aron mahimong sumsoman sa mga bugalbugal sa ubang kanasuran; ug
• Pagpalambo sa nasudnong industriya sa pagpamakak ug sayop nga kasayuran nga nakamantsa sa sistema sa edukasyon, nakatay-og sa lehitimong media organizations (sa kaso sa ABS-CBN, nakapahilom sa mga sibyaanan ug nakataktak sa kaliboan ka trabahante sa mga rehiyon) ug nakahulga sa kaligdong sa piniliay.
- Latest
