Pagtingal sa luod nga kausaban
Nilampos ang administrasyon ni Presidente Rodrigo Duterte sa pagpugos sa mga Pilipinhon sa pagdawat sa labing bangis nga kausaban nga iyang gipasiugdahan:
• Ang atong kakugang sa laktod nga pinatyanay sa unang tuig sa iyang kampanya sa ilegal nga drugas, dihang nasundan og kaliboan pa, napulihan sa pagdawat nga mahimong way institusyon nga mangahas sa pagbadlong niya; ug
• Ang atong kasuko sa bantang nga kinawatay sa iyang mga tinudlo, dihang nasundan og mas dagko ug mas daghan pa, napulihan sa pagtahan nga lain na sab ning saad nga wa niya matuman.
* * *
Mao ni iyang gihimo sa pagkabisto sa binilyon ka pesos nga mga transaksiyon sa Pharmally Pharmaceutical Corporation uban sa Procurement Service sa Department of Budget and Management (PS-DBM):
Lisod mang tubagon nganong bag-ong kompaniya nga wa kaabot og milyon ang puhonan ug way track record sa susamang mga transaksiyon maoy nakasipong sa kinadak-ang mga kontrata sa P42 bilyones sa Department of Health (DOH) nga gidalidali pagbalhin ngadto sa PS-DBM, iyang gihudlat ang mga imbestigador ug gi-absuwelto ang tanang apil sa mga palusot kay siyay nagsugong lakturon ang mga lagda.
* * *
Dihang nangalisbo ang dugang mga binuang sa mga transaksiyon sa padayong imbestigasyon sa mga senador, niusab sa iyang linya ug niingon na nga mahimong kasohan ang taga Pharmally. Pero ang mga lakang sa mga hingtungdan mas lanog kay sa iyang sulti:
• Ang pagpili sa managsuong Mohit ug Twinkle Dargani sa Davao City nga sukaranan sa ila untang paglayas sa Malaysia nagpakita nga masaligon silang mas luwas sa pinuy-anan sa presidente; ug
• Ang pagkuha sa mga Dargani sa serbisyo sa abogadong kanhi opisyal sa Malakanyang nagmatuod nga may koneksiyon sila sa kinatas-ang ang-ang sa burukrasya.
* * *
Mao nay mensaheng itingal ni Presidente Duterte ni bisan kinsang mangahas pagsukwahi: Duna siyay mandato, way makabaraw niya ug ang mga nagplano pagbabag mas maayong mosusi una unsay gidangatan nilang Senador Leila de Lima, Chief Justice Maria Lourdes Sereno ug ubang nahiagom sa mas bangis nga kapalaran.
Ang makauuwawng linigwatay sa politika sa nangaging mga semana mao say iyang mensahe sa mga nagsalig nga hapit na mapupos ang iyang termino: Himuon niyang tanan, bisan unsa kaluod ug kabangis, aron magpabilin sa gahom.
- Latest
