May pinalabi bisan sa bakuna
Hasta sa bakuna batok sa COVID-19 maklaro hain kapusta si Presidente Rodrigo Duterte:
• Tungod sa donasyon nga usa ka milyon ka doses sa bakuna sa Sinovac, ambot kapila na balikbalika og pasalamat sa presidente ang China, mao pa gani gihimong rason nganong wa mangisog sa pagpanghasi sa Chinese maritime militia boats sa West Philippine Sea; pero
• Bisan 2.47 milyones ka doses sa Pfizer na ang nahatag sa Estados Unidos, wa pa kong kadungog bisan kausa na lang nga nipasalamat ang presidente sa mga Amerikanhon, nga padayon hinuon niyang gibalikas.
* * *
Sa 14.2 milyones ka doses sa mga bakuna sa COVID-19 nga naabot na sa Pilipinas, duha ra ka bakuna ang pinalit sa pamunoan ni Presidente Duterte. Nakatag-an ka, ang mga bakuna ra sa China ug Russia:
• 8 milyones ka doses na sa Sinovac ang niabot sa 25 milyones ka doses nga gidalidali og kompra sa Malakanyang; ug
• 180 mil pa ka doses sa Sputnik V ang niabot sa 20 milyones ka doses nga gidalidali sab og palit sa Malakanyang human nagkasulti silang Presidente Duterte ug Russia President Vladimir Putin.
* * *
Sa pikas nga bahin, libre ang lima ka milyon na ka doses sa AstraZeneca ug Pfizer nga nadawat sa Pilipinas. Gawas sa Pfizer, nakadawat ang Pilipinas og 2.56 milyones ka doses sa AstraZeneca pinaagi sa Covax sa World Health Organization nga gibugtian lang sa Malakanyang og $1 milyones (P48.7 milyones) nga donasyon.
Nakapirma na hinuon si vaccine czar Carlito Galvez Jr. sa kontrata pagpalit og 40 milyones ka doses sa Pfizer, ang kinadak-ang transaksiyon sa mga bakuna karong tuiga.
* * *
Sa opisyal nga mga numero nga gipagawas sa Department of Health (DOH) niadtong Dominggo, Hunyo 20, niabot na og 2,153,942 ka Pilipinhon ang nahatagan sa duha ka doses sa bakuna. 1.96% pa hinuon sa nasudnong populasyon pero hinaot nga makabuylo nang pamakuna karong semanaha tungod sa pag-abot sa mas daghang suplay.
208,809 na ang nabakunahan kada adlaw. Hinaot paspasan pa. Kay kon malansang ning gikusgona, ang pagbakuna sa target nga 70 milyones maabtan og usa ka tuig ug pito ka buwan. O sa Marso 2023 na makab-ot ang herd immunity.
- Latest
