^

Yano, barato, kinakusgang sagang

ARANGKADA - Leo Lastimosa (The Freeman) - April 20, 2021 - 12:00am

Sa wa pang Ivermectin, may epektibo nang panagang sa COVID-19. Gilalisan pa makabaraw ba g’yud sa kagaw ang pagsige og tomar sa Ivermectin, pero may mas yano nga paagi sa pagpanalipod nato gikan sa SARS-COV-2, ang kagaw nga moresulta sa COVID-19.

Samtang nangita pa ang Department of Health (DOH) ug World Health Organization (WHO) sa clinical trials nga momatuod sa pangangkon sa mga nangampanya para sa Ivermectin, may abunda nang mga pagtuon sa mas epektibong depensa. Ug, nakatag-an ka, mas barato pa ni kay sa tag-P35 ang buok nga Ivermectin.

 * * *

Lisod pangitaon ang luwas nga Ivermectin --kinahanglang para sa tawo (human grade), likayan ang para sa kabayo ug ubang dagkong hayop kay makaguba sa atong lawas ug mas maayong paliton gikan sa mga doktor nga kamaong mosagol ini sa ubang kemikal aron mahimong mas epektibo.

Samtang labihan kasayon ang paghimo sa napamatud-ang sumpa sa COVID-19: Bisan unsang tabas sa panapton (mas maayong tulo ka sapaw sa lainlaing materyal, pero mga pagtuon nagmatuod nga epektibo bisan usa ra ka piraso sa bisan unsang panapton) nga igong makatabon sa baba ug ilong.

 * * *

Katag-an ka, ang face mask nga tarungon pagsul-ob maoy napamatud-an nga kinakusgang panalipod batok sa COVID-19:

• Kon mo-ubo o mo-atsi, makapugong sa pagtuasik sa laway o sip-on;

• Kon may mamisik man ug bisan simbako may kagaw na, ang face mask mosagang sa kinadak-ang bahin sa viral load maong makapugong sa grabeng symptoms; ug

• Ang humidity (umog nga hangin) nga mamugna sa face mask mopabasa sa agianan sa ginhawa nga makapalig-on sa immune system ug motangtang sa kagaw nga nipilit sa plema ug makamugna og interferons batok sa kagaw.

 * * *

Dugang mga pagtuon nagpakita nga ang face mask nagsilbing pasiuna nga bakuna. Posibleng may mga natakdan na pero, kay nag-face mask man, gamay rang viral load nga nakasud maong wa kamugna og sakit pero igo nang nakatudlo sa antibodies pagsagang sa samang umaabot nga kagaw.

Maong sunod nimong kadungog sa tuo-tuo nga makadaot ang face mask kay mobalik sa baga ang hugawng gininhawa, pasalamati ang panapton nga tabon sa imong baba ug ilong. Kay nakaluwas nimo gikan sa multa, sa alingugngog nga tentasyon sa Ivermectin, ug sa COVID-19.

IVERMECTIN
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with