^

Ilang alkontra sa pandemya

ARANGKADA - Leo Lastimosa (The Freeman) - April 18, 2021 - 12:00am

Haskang lisora pasabton ni Presidente Rodrigo Duterte sa tinuod nga mga problema nga nakapahagsa sa iyang kampanya batok sa COVID-19, maong mas nisulbong ang bag-ong mga kaso kapin sa tuig human nagsugod ang pandemya, nga ang tarung nga mga opisyal nga naglibot niya nihunong na lang sa pagsuway.

Sayo sa niaging tuig, dihang nisugyot silang hingusgan ang contact tracing, gipalabi sa presidente ang pagpakatap og dugang mga polis. Dihang nirekomendar sila sa pagpalapad sa swab testing, gipili sa presidente ang pagpaapil sa mga sundawo ug paghimong mas istrikto sa checkpoints.

***

Karong tuiga, dihang niawhag sila pagsulbad sa pag-awas sa mga ospital, nga kasagaran sa kapin sa gatos nga nangamatay kada adlaw wa malili sa mga doktor, nihulga siya paggamit sa gahom pagsakmit sa mga hotel aron kapahimutangan sa mga pasyente.

Klaro nga ang iyang gipaminaw mao rang bahin sa report nga puno nang mga hotel sa Metro Manila ug di mahimong gamiton nga isolation facilities. Nihunong na pagpaminaw sa tumoy sa kasayuran nga ang nakapuno sa hotels maong OFWs nga gi-quarantine sa ilang pagpauli human nataktak sa trabaho sa ubang kanasuran.

***

Sama sa kasagaran nato, ang presidente wa kaandam sa pagkatap sa kagaw nga nakapaluhod sa tibuok kalibotan. Pero lahi sa kasagaran nato, nga naningkamot pagtuon unsaon pagpanalipod sa kahimsog sa way pagsurender sa mga panginabuhi, ang presidente nagdumili pag-atubang sa kaseryuso sa katalagman.

Maong imbes magtuon unsay ipasabot sa ilang kampanyang T3 (trace, test, ug treat), niinsistir pagtutok sa mas pamilyar niyang panghudlat sa mga durugista ug mga komunista. Ug labaw sa tanan pagbinastos sa paborito niyang senadora.

***

Mao ni ang tinuod nga hinungdan nganong labihan kasimang sa pagsugo niya sa mga sakop sa gabinete niadtong Huwebes sa pagpasalig nga nagpadayon ang mga proyekto sa gobyerno bisan sa pandemya:

- Atubangan sa tiyabaw sa healthcare workers nga puno nang mga ospital maong ang mga pasyente nga wa mangamatay padayong niipon ug nanakod sa ilang pamilya ug mga silingan, nipasigarbo ang Malakanyang nga nindot kaayo ang airport sa Calbayog, Samar; ug

- Atubangan sa nabistong kakuwang sa contact tracing ug swab testing, gibandilyo sa Malakanyang nga labihan katahom sa pantalan sa Tagbilaran City, Bohol.

COVID-19
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with