Buhis ang nagpalihok sa trolls

Sa iyang pagsaway sa Facebook tungod sa pagtangtang sa kapin sa gatos ka fake accounts sa Philippine National Police (PNP), Armed Forces of the Philippines (AFP) ug sa China nga pulos pabor niya, sama ra nga giangkon ni Presidente Rodrigo Duterte nga duna siyay trolls nga nipakatap og sayop nga kasayuran sa mga plataporma sa social media.

Maong may sukaranan ang kabalaka sa nagpakabana nga mga sektor nga dako ang kahigayonan nga kuwarta sa gobyerno, buhis nga siningtan sa katawhang Pilipinhon, ang gigasto sa artipisyal nga pagpaburot sa popularidad sa presidente.

* * *

Ang kalapad sa iyang social media, nga giangkon sa mga tagduma sa iyang kampanya nga nagsugod sa 2014, duha ka tuig sa wa pa modeklarar sa iyang kandidatura pagka presidente, maoy giisip nga labing dakong bentaha nga nakapadaog ni Duterte niadtong 2016.

Gipakaingon nato nga ang iyang social media, nga gawas nga bungkaga gipalambo pa sa pagbanos niya sa Malakanyang, gipangdasok lang sa ngiob nga internet cafes o tinago nga mga lawak sa pribadong buildings. Apan napamatud-an sa Facebook nga mga polis, mga sundawo ug mga langyaw ang iyang trolls.

* * *

Mao diay nga ang trolls nga nanglawgaw sa labing seryuso nga mga pasangil batok sa pamunoan--gikan sa pagpanggukod sa ABS-CBN ug ubang mga sakop sa media ug sa pagtabon sa gipasanginlang mga kurakot nga mga sinaligan sa presidente--labihan kaisog ug way pupanagana nga nanghudlat sa mga nangahas pagsukwahi sa ilang linya sa propaganda.

Kay pulos diay armado ug unipormado nga may katakos pagtinuod sa ilang mga hulga, hinakalimtan nga mga sinuholan sa katawhan nga ilang gilibog.

* * *

Nipasidaan dayon si House Speaker Alan Peter Cayetano nga imbestigahon sa mga kongresista ang kadagkoan sa Facebook nganong ang accounts ug pages rang pabor sa gobyerno maoy gipanangtang. Giluwatan ni Cayetano ang pasidaan dihang nagsige pa og tila sa lapalapa sa presidente aron nga malugwayan ang iyang liderato nga nauyonang mapupos na karong buwana.

Atong susihon kon palabihon bang kasipsip kay sa pagpanluod nga nisugot ang presidente nga pulihan na siyang Lord Allan Velasco.

Apan kon tinud-on ang imbestigasyon, mas maayong mailhan kinsay utok sa pagamit sa PNP ug AFP sa pag-ilad inay pagpanalipod sa katawhan.