Mas epektibo kay sa bakuna
ARANGKADA - Leo Lastimosa (The Freeman) - September 18, 2020 - 12:00am

Samtang nagpadayon ang mga pagtuon sa kahigayonan nga ang mga tabon sa baba ug ilong nagsilbi na nga pasiunang bakuna batok sa COVID-19, niluwat og mas makapakugang nga pahibawo ang tagduma sa Centers for Disease Control and Prevention (CDC) sa Estados Unidos nga si Dr. Robert Redfield:

Ang pagsul-ob og face masks mahimo nga makahatag og mas maayo nga panagang sa SARS-Cov-2 kay sa gikahinaman sa tibuok kalibotan, apan wa pay klaro kanus-a mamugna ug wa gani garantiya kon makapanalipod ba g’yud sa katawhan gikan sa pandemya, nga bakuna batok sa COVID-19.

***

Sa iyang pag-atubang sa Amerikanhong mga senador nga nagtuki sa gisugyot nga gahin sa CDC alang sa sunod tuig, gipasabot ni Redfield nga samtang ang face masks napamatud-an na sa kalibotanong mga pagtuon nga makapanalipod sa katawhan gikan sa COVID-19, daghan pang kadudahan sa nag-una nga kandidatong mga bakuna:

- Ang immunogenicity, o ang katakos sa bakuna sa pagpalihok sa immune system batok sa kagaw, mahimong 70% ra; ug

- May sukaranan ang mga kabalaka nga ang mga bakuna di makamugna og panalipod nga may igong lahutay pagbadlong sa kagaw.

***

Usa sa nakaaghat ni Redfield pagsubli pagtataw sa kamapuslanon sa face masks mao ang padayon nga pagdumili ni US President Donald Trump ug sa iyang mga dumadapig sa pagtabon sa ilang baba ug ilong. Nipasalig siya nga makontrolar ang pandemya kon mag-face mask ang mga Amerikanhon sa mosunod nga duha ngadto sa tulo ka buwan.

Matod ni Redfield nga sa gatosan ka kandidatong tambal ug bakuna nga gipaubos og clinical trials sa nagkalainlaing kanasuran ang face masks ang kinakusgang panalipod batok sa COVID-19.

***

Ang pagduda ni Redfield sa ka-epektibo sa mamugna nga mga bakuna gisaw-an ni Dr. Anthony Fauci, tagduma sa National Institute of Allergy and Infectious Diseases, kinsa niingon nga gamay rang kahigayonan nga may bakunang makahatag og 98% nga panagang sa COVID-19.

Naglaom si Fauci og bakuna nga 75% nga epektibo. Ang kadagkoan sa US Food and Drug Administration (FDA) nipahibawo nga ilang tugotan ang bakuna nga labing menos 50% nga epektibo. Nga sama ra sa mga bakuna sa kasarangang flu apan menos sa mga bakuna sa tipdas nga 93% nga epektibo.

COVID-19
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with