Usa ka adlaw human nangangkon si Mandaue City Mayor Jonas og kalamposan sa eksperimento sa trapiko sa UN Avenue ubos sa Marcelo Fernan Bridge, natanggong mi sa trapiko sa nasudnong highway sa Mandaue. Naabtan mi og kapin sa oras sa pag-aginod sa mga sakyanan gikan sa Barangay Jagobiao paingon sa Barangay Tabok.
Ang tulo ka kilometrong biyahe nakuha ra niadto og 30 ka gutlo sa kasarangang adlaw, o 45 ka gutlo kon huot, o 15 ka gutlo kon hapsay. Nisamot ang kalbaryo sa mga motorista ug mga pasahero human sa eksperimento.
***
Gitumbok sa mga natanggong sa matag adlaw nilang biyahe gikan ug padung sa ilang mga pinuy-anan ug mga buhatan ug eskuylahan ang posibleng mga hinungdan sa mas grabeng pagkabara sa highway:
•Nibalhin sa highway ang kasagaran sa mga sakyanan gikan ug padung sa North Coastal Road sa Cansaga inay molatas sa apiki kaayong Burgos St. ug sa upat ka kilometrong simanganan paingon sa U-turn slot ilawom sa taytayan; ug
•Nibalhin sab sa highway ang mga sakyanan nga nilikay sa giayong eskina sa Pagsabungan ug dan gikan sa Pilit paingon sa Cabangcalan.
***
Nipasalig ang traffic enforcers sa Mandaue nga mahapsay ang trapiko sa nasudnong highway sa bag-ong eksperimento sa Maguikay flyover nga ilang gisugdan niadtong Lunes. Ang pagkatanggong sa mga sakyanan sa ikaduhang adlaw sa eksperimento gahapon nagpasabot nga daghan pa sila og trabahuon.
Hinaot nga matinud-anon silang moangkon sa sangpotanan sa ilang mga eksperimento. Di makaayo sa tanang hingtungdan ang paglawog nila og sayop nga kasayuran alang sa State of the City Address sa mayor.
***
Nangangkon ang traffic enforcers sa Mandaue nga naghimo sila og pagtuon ug simulations sa wa pa ilusad ang mga eksperimento. Mahimo bang pakisaw-an nila sa publiko unsay mga pagtuon nga gihimo, pila ka sakyanan ang naihap ug gipangutana ba ang mga motorista ug mga pasahero unsa kamakiangayon ang kausaban alang nila?
Ang labing bangis nga eksperimento mao ang pag-drowing ra sa papel, paghimo sa publiko nga mga kiko ug pagpatuman dayon sa kausaban bisan unsa pay sangpotanan. Tungod lang kay sila ang nagtungkawo sa gahom ug busa di kinahanglan nga mangonsulta ni bisan kinsa.