Abuso sa monopoliya sa Grab
ARANGKADA - Leo Lastimosa (The Freeman) - December 9, 2018 - 2:07am

Luoy g’yung mga konsumidor sa monopoliya. Mao ni nasinati sa mga pasahero dinhi sa Sugbo human naghiusa ang Uber ug Grab pipila ka buwan ang nilabay. Dihang nagkumpetensiya pa sila, nagpinuhalay ang duha ka kompaniya sa pagpalambo sa ilang serbisyo ug paghatag og mga insentibo ngadto sa ilang mga drayber ug mga pasahero.

 

Apan human naghiusa ang duha ka kompaniya pulos nitiyabaw ang ilang mga pasahero ug mga drayber. Ang mga pasahero nag-antos na sa bati nga serbisyo ug mas mahal nga plitehan. Samtang mga drayber giulug-ulogan og mas gagmay’ng insentibo.

 

***

Kasagarang reklamo sa mga pasahero nga akong nahinabi batok sa Grab mao ang kadugay nilang maka-book og sakyanan. Ang Grab app magsige lang og balibad nga way drayber nga makakuha nila. Nagduda ang mga pasahero nga pilian na kaayong mga drayber, kon di sila ganahan sa destinasyon di nila tagdon ang booking, kay wa na man silay kumpetinsiya.

Ang karibal nga mga kompaniya nga gitugotan sa Land Transportation Franchising and Regulatory Board (LTFRB) di kaambas sa kahinog sa teknolohiya sa Grab. Usa ka karibal dinhi sa Sugbo gisaway sa mga drayber nga mas daghang kaging kay sa booking.

***

Nagbagulbol sab ang mga drayber sa Grab. Human nawagtang ang Uber, gawas nga gidugangan sa Grab ang gidaghanon sa mga biyahe una sila makadawat og cash incentive gilaslasan pa g’yud ang ilang insentibo.

Mao nga kay hangtod karon makakita pa man sila sa destinasyon sa mga pasahero bisan sa sugo sa LTFRB nga tangtangon na ni gikan sa Grab app magpili sila og mga ruta nga di sila matanggong sa trapiko ug mas daghang mo-book nga mga pasahero.

***

Sama sa naandan, inutil ang LTFRB sa pagbadlong sa pangabuso sa Grab. Lahi sa mga taxi nga ilang magukod kon mobalibad sa mga pasahero nga mopara nila sa kadalanan, di nila mailhan ang mga drayber sa Grab nga mo-isnab sa mga pasahero online.

Gikuwestiyon tuod sa LTFRB ug ubang ahensiya sa gobyerno ang paghiusa sa Grab ug Uber. Apan kutob ra sila sa istorya. Lahi sa Singapore kansang regulator agresibong nipahamtang ug mas dagkong multa sa napamatud-an nga panagkonsabo sa duha ka mapahimuslanong kompaniya.

leo_lastimosa@abs-cbn.com

GRAB
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with