Sa kataposan, nakaamgo na ang mga senador ug mga kongresista nga dakong sayop ang ilang pagtugot nga pahamtangan og excise tax ang mga produkto sa lana ubos sa Tax Reform for Acceleration and Inclusion (TRAIN) Law nga gipamugos sa economic managers ni Presidente Rodrigo Duterte.
Sa kataposan, ila nang gitun-an ang kahigayonan nga di lang masuspenso kon dili hingpit na g’yung mapapas ang mga probisyon sa TRAIN nga nibunal og dakong buhis sa matag litro sa krudo ug gasolina ug ubang produkto sa lana sud sa tulo ka tuig sugod karong tuiga.
* * *
Apan mahimong uwahi nang tanan. Kay gidasonan na sa presidente ug sa gabinete ang rekomendasyon sa economic managers nga bakwion ang nahaunang sugo sa pagsuspenso ug ipadayon pagpahamtang ang ikaduhang hugna sa buhis karong bag-ong tuig.
Ug nahibawo na ta sa kamada sa Kongreso. Makabungog ang mayoriya sa mga alyado sa administrasyon. Way usa nila nga mangahas sa pagsukwahi sa presidente. Human nakahukom si Presidente Duterte nga patongan og laing P2 matag litro ang krudo ug gasolina karong Enero 1, kinsa may mangisog sa pagsulti nga sayop siya?
* * *
Kadudahan pa gani kon tinuod ba g’yung nibati alang sa kinabag-an sa katawhan nga naapiki sa TRAIN Law ang mga senador ug mga kongresista nga nagkara-kara na karon sa pagpahibawo nga moduyog sila sa mga paningkamot pag-usab sa balaod.
Kay kasagaran sa mga nagtikaw-tikaw managan sa piniliay unya sa Mayo 13, 2019. Tingali nabalaka lang nga mahiagom sa trahedya ni Senador Ralph Recto --napilde pagka senador niadtong 2007 tungod sa iyang pagduso sa expanded value added tax (EVAT).
* * *
Maong sa di pa ta malimot, niang listahan sa 16 ka senador nga nibotar sa TRAIN: Sonny Angara, Nancy Binay, Frank Drilon, JV Ejercito, Chiz Escudero, Win Gatchalian, Dick Gordon, Gringo Honasan, Loren Legarda, Joel Villanueva, Koko Pimentel, Grace Poe, Ralph Recto, Tito Sotto, Cynthia Villar, ug Migs Zubiri. Unom nila ang mangumbinser nga ibalik sila sa Senado sa piniliay lima ka buwan gikan karon --Angara, Binay, Ejercito, Pimentel, Poe, ug Villar.
Upat ang nisupak sa TRAIN: Ping Lacson, Risa Hontiveros, Bam Aquino, ug Antonio Trillanes. Usa ra nila, si Aquino, ang magpapili pagbalik karong Mayo.