Inutil sa mga abuso

Nabantang ang kainutil sa nagkalainlaing ahensiya sa gobyerno sa labing bag-ong mga kontrobersiya nga naglambigit sa duha ka kompaniya sa barko: Ang pagkalunod sa barko de karga sa kadagatan sa Talisay City; ug ang pagkahugno sa scaffolding sa gitukod nga building sa Tejero, Cebu City, gahapon sa kaadlawon.

Wa pa masuyop ang nahibiling lana ni mapalutaw ang nalunod nga barko dul-an sa duha ka semana na human sa insidente. Naabtan og kapin sa upat ka oras una nakasud ang mga opisyal sa gobyerno ug nakasusi sa nahugno nga kabahin sa building.

* * *

Pila lang ka oras human sa pagkalunod sa MV Fortuner niadtong Mayo 7 sa kadagatan duol sa Cansojong, Talisay City, nipahibawo ang Philippine Coast Guard (PCG) nga:

• Gipalibotan dayon nila og oil spill boom ang dapit nga nalunoran;

• Gi-apura ang tag-iya sa barko sa pagsuyop sa tanang nahibilin nga bunker fuel aron kalikayan ang oil spill; ug

• Giawhag ang tag-iya sa pagkontrata dayon og salvor company nga mopalutaw sa barko aron nga di makahulga sa ubang mga barko nga mangagi sa samang ruta pagsud-gawas sa kadagatan sa Sugbo.

* * *

Apan nadiskubrehan ni Talisay City Councilor Jojo Bacaltos, tsirman sa Committee on Environment, nga way oil spill boom nga napahimutang. Dihang iyang gisukmatan, nipasabot ang kadagkoan sa PCG nga wa sila’y kataoran og boom sa dapit nga nalunoran.

Kay nangiyugpos ra ma’ng PCG ug wa man nagpakita ang tag-iya sa Seen Sam Shipping Company nga si Benson Go, nagpalaban si Bacaltos sa Maritime Industry Authority. Apan niangkon ang kadagkoan sa MARINA nga wa sila’y gahom pagpugos sa kompaniya sa barko.

* * *

Pila ka oras sa wa pa moadto si Bacaltos sa MARINA, gitak-opan sa Lite Shipping Corporation ang compound sa ilang building kansang scaffolding nahagsa ug nakaangol og labing menos tulo ka trabahante.

Wa pasudla ang mga ambulansiya sa Cebu City Emergency Medical Services (EMS), gipasud ang usa ka bombero apan giingnang way naangol ug gitanggong ang mga biktima. Pasiunang kasayuran nakuha sa DyAB Radyo Patrol gikan sa usa sa naangol nga niikyas aron magpatambal. Naabtan og dul-an sa lima ka oras ang Cebu City Engineer’s Office ug Department of Labor and Employment una nakasud.