Sa una nilang panagtagbo isip mga konsehal sa Dakbayan sa Sugbo, si Margot Osmeña nagsugod sa ikaduha niyang termino ug si Mary Ann delos Santos sa iyang una, wa silay tingganay. Bisan dug-ol rang ilang mga lingkoranan. Pulos napugngan sa higpit nga panagsungi sa ilang politikanhong mga partido ug sa kalab-as pa sa baslanay sa bag-o rang nahuman nga kampanya.
Apan sa nisunod nga mga sesyon, kay kinahanglan man gyod silang mag-abot matag Miyerkules, nagpahiyomay na sila. Apan nabantayan ni Osmeña nga labihan kaseryuso ni delos Santos sa iyang trabaho. Way nangahas paghimo og bisan unsang pagsuway sa pagtapak sa dakong kang-a sa politika tali nila.
* * *
Una nilang bayloay og sulti nahitabo dihang nagkadungan og sud sa caucus room alang sa ilang paniudto. Si delos Santos maoy unang nitimbaya ni Osmeña: "Di ko mao sa imong gituohan no?" Nitubag si Osmeña" "Ako sab no?" Ang nisunod nilang mga sesyon nakasaksi sa inanay nga nihukas sa sayop nilang pagtan-aw sa usag-usa.
Tungod sa awhag ni Konsehal James Cuenco nga bisan sa managlahi nilang partido angayng maghiusa ang mga konsehal, gidapit silang delos Santos sa resort sa iyang pamilya sa Carmen sa amihanang Sugbo. Nanggawas ang mga hulagway nilang duha sa social media. Nga nakapatumaw sa mga huhungihong sa M&M sa piniliay sa 2016.
* * *
Nisamot ang ilang kasuod nga nakaako na si Osmeña pagpangutana ni delos Santos kon mahimo bang magtagbo sila uban ni kanhi Mayor Tommy Osmeña. Nitanyag si delos Santos sa iyang pinuy-anan. Nadasig pag-ayo ang magtiayong Osmeña sa way pupanagana nga pagbukas ni delos Santos sa iyang kaugalingon.
Bisan sa di kalikayan nga mga panagana sa tanang hingtungdan, ang labing unang pag-atubangay nilang delos Santos ug kanhi Mayor Osmeña, human sa taas ug mabulukon uyamot nilang mga engkuwentro sa nangaging mga piniliay, nilungtad og upat ka oras, nagsugod sa alas-8 sa gabii ug nilungtad hangtod sa tungang gabii.
* * *
Natugkad ni Konsehal Osmeña ang kalidad sa panghunahuna ni delos Santos sa una niyang pangutana: Nahibawo ba sa ilang panagtagbo ang mga sakop sa Bando Osmeña-Pundok Kauswagan? Mas nadasig siya sa tubag ni delos Santos sa pangutana unsay mahatag sa BOPK niya: "Gusto kong mag-konsehal."
Nisunod ang konsultasyon sa nagkalainlaing sektor sa Lahug. Bisan si kanhi Mayor Osmeña, nga gipasidunggan sa makinarya sa BOPK nga nidominar sa pamolitika sa dakbayan, nibilib sa ka-organisado sa mga dumadapig ni delos Santos. Natunaw ang pasiunang tensiyon dihang gipahinumdoman sa mga lider ni delos Santos ang kanhi mayor nga sige siyang kapilde sa ilang teritoryo.
Sa labing uwahi nilang panagtagbo sa sesyon niadtong Miyerkules, gihulagway ni Konsehal Osmeña si delos Santos nga nialimbukad, gaan og buot ug morag nakuhaan sa tanang palas-unon.