Dugay na nga mipahibalo si Vice President Jejomar Binay nga molansar siya sa pagka presidente sa nasud sa eleksyon karong Mayo 2016, apan hangtud karon mura'g wala pa'y mipadayag og kaisog nga mo-tandem kaniya.
Ngano man? Mahadlok nga maapektahan ang ilang kandidatura unya tungod sa bati nga imahe ni Binay? Nadungog na nga si Senador Grace Poe gitanyagan ni Binay nga maoy mo-tandem kaniya pagka bise presidente apan mura'g wala ganahi si Poe.
Kun ako pa si Binay tubagon nako ang mga pasangil batok kaniya kay kinsa may ganahan nga makig-tandem sa usa ka tawo nga naputos sa mga pasangil sa pagpangawkaw? Malagmit nga maduhig ra unya sa bati nga imahe ang makig-tandem kang Binay.
Ambot kun matinuod ba kini'ng tabi-tabi nga usa ka dako'ng opisyal sa Pag-IBIG nga suod kaayo sa chief of staff ni Binay maoy iyang ka-tandem unya sa eleksyon. Ang nakaapan lang kay mura'g kuwang pa sa kainila ang maong tawo.
Para kanato'ng mga botante, angay gayud kita nga mangita'g tawo nga wala g'yuy binuang nga maoy palingkuron nato sa Malacañang. Hangtud nga si Binay dili makalimpyo sa iyang kaugalingon sa pasangil sa pagpangawkaw, sigurado ko nga ang mga botante dili mobotar kaniya.
Busa, may higayon ka pa Mr. Vice President sa paglimpyo sa imong kadungganan sa pasangil nga gipaburot pag-ayo ang kantidad sa gipatukod nga parking building sa Makati City diha nga siya pa ang mayor.
Nabalita usab nga gi-overprice ang pagpatukod sa Makati City Science High School building. Hangtud nga dili pa kini matubag ni Binay, apektado kaayo ang iyang tinguha nga magpapili pagka presidente.
Tan-aw lagi nako, kun mius-os man ang kainila ni Binay sa mga survey nga gipahigayon nga wala pa gani lig-on nga kontra nga mipadayag nga moatbang kaniya, mosamot pa g'yud og katiurok ang iyang kainila kun may modeklarar na nga moatbang kaniya pagka presidente, unya lig-on.
Nakadawat ra ba ko og report nga si DILG Secretary Mar Roxas mura'g pormal na nga ituboy ni Presidente Aquino pipila ka buwan gikan karon nga maoy padaganon sa Partido Liberal pagka presidente.
Husto g'yud ang gihimo ni Mar Roxas nga nagpakahilom lang usa ug wala moapil-apil sa pagpangampanya kay ang katawhan modayeg kaniya kay wala mopahimulos sa iyang higayon.
Kun dawaton man ni Roxas ang tanyag nga siya ang padaganon sa Partido Liberal nga maoy molansar sa pagka presidente, tukma kaayo nga napamatud-an niya ang kamaayo niya modumala sa nasud pinaagi sa pagdumala niya karon sa DILG.
Apan may uban usab nga mga senador nga posible'ng molansar sa labing taas nga puwesto sa nasud. Kini naglakip nila ni Senador Chiz Escudero ug Senador Grace Poe.
Si Poe hinuon mura'g kuwang pa og kasinatian sa pagpadagan sa kagamhanan kun itandi nila ni Mar Roxas ug Escudero. Usbon ko, kita'ng mga botante angay gayud nga mohashas kinsa ang atong paluyohan sa umaabot nga presidential elections.
***
Nabalaka si Konsehal Dave Tumulak, pangulo sa City Disaster Risk-Reduction Management Council, nga modagsang pa ang pagpamusil sa Barangay Inayawan.
Sukad sa miagi'ng tuig, kapin na sa 20 ka pagpamusil ang nahitabo sa Inayawan ug ang 16 niini pulos g'yud patay ang mga biktima. Taga diha ra sa Inayawan ang mga tawo nga responsable.
Sa ato pa, bawos-bawos ra tingali ang nahitabo. Mahimo nga ang kabanayan sa gipusil mao usab ang mibawos sa pagpusil. Dili kaha maayo nga itug-an ninyo kinsa sa inyo'ng mga silingan ang adunay mga armas nga walay lisensya?
Ang mga tawo gud nga lisensyado ang armas dili gayud magpataka og pagpamusil, lahi sa mga naghupot og walay lisensya nga armas nga ang mga utok mao ra ang paggamit dayon sa ilang armas kun bation sila og kasuko.
Ang mga tag-iya og lisensyado'ng armas maghuna-huna nga ang ilang pusil gamiton lang sa pagpanalipod sa ilang kaugalingon.