Daghan nga mga proyekto nga nagkantidad og minilyon ka pesos nga buot ipatuman sa administrasyon ni Mayor Michael Rama ang wala pa mapatuman pagkakaron.
Nagtuo ang mayor nga ang uban niini "giyak-an" lang sa pipila ka komitiba diha sa Cebu City Council, nga sa ato pa gipasagdan ra ug wala hatagi og pagtagad.
Gusto karon sa mayor nga susihon kon unsa kini nga mga proyekto nga apektado kay wala pa mapatuman bisan og aduna na'y kuwarta nga gigahin aron iyang pahibaw-on ang katawhan.
Maayo 'sab ang lakang sa mayor aron nga kon tinuod man adunay mga konsehal nga nagpabaya lang sa ilang katungdanan molihok na.
Apan kon tinud-on man gani ni Mayor Rama ang pagpahibalo sa publiko kon unsa nga mga gisugyot niya nga proyekto nga hangtud karon wala pa mapatuman, angay lang 'sab nga ibutyag usab ang rason ngano nga wala kini suportahi sa konseho.
Nakasabot ko sa kabalaka sa pipila ka konsehal nga nangagpas nga basin og pasanginlan lang g'yud sila nga mibabag sa mga proyekto nga buot ipatuman sa mayor, apan ang tinuod mao nga wala pa mapatuman ang proyekto kay dunay mga legal nga rason.
May mga proyekto man gud sama sa drainage nga anha molagbas sa pribado'ng mga luna ug ang kagamhanan kinahanglan nga mangayo pa og pagtugot sa tag-iya sa yuta.
Duna 'say ubang mga proyekto nga gusto nga adto kuhaon ang kuwarta sa Pagcor Funds apan pagsuta sa Committee on Budget and Finance wala kini masubay sa mga lagda nga gilatid sa Pagcor.
Ang Philippine Amusement and Gaming Corporation naghatag kada buwan og P4 milyones dinhi sa dakbayan sa Sugbo apan sila ang nagbuot kon unsa nga mga proyekto ang gastohan sa ilang donasyon.
* * *
Karong semanaha subli na usab tingali nga padad-an sa mga opisyal sa Cebu City Hall og Notices of Violations ang mga tag-iya og balay-patigayon nga mitukod sa ilang building sa daplin sa mga sapa, labaw na kadtong anaa g'yud ibabaw sa mga sapa.
Base sa giandam nga suwat sa City Legal Office, pahibaw-on nila ang tag-iya sa mga balay-patigayon nga sila nakalapas sa daghang mga balaod kay mitukod og building diha sa gitawag og "three meter easement."
Walay problema ang pagpadala sa Notices of Violations kay kapila ra man ang pagpa-receive. Ang problema kon kanus-a ang sunod nga lakang sa mao nga katuyoan.
Kabahin sa suwat sa City Legal Office mao ang pag-awhag sa mga hingtungdan nga tag-iya ug tagdumala sa mga balay-patigayon nga gub-on nila ang kabahin sa ilang building nga anaa sa gidili nga lugar. Pagkanindot kon mapatuman kini ni Mayor Rama, apan kanus-a kaha kini kasugdi?
Nagkinahanglan kini og "political will" ug kinahanglan nga si Mayor Rama mohugot daan sa iyang bakus kay kon tinud-on kini niya, ang mao nga mga magpapatigayon maghugpong sa pagbatok kaniya sa sunod nga eleksyon.
Kini maoy rason nga daghang politiko nga maglisod sa pagpatuman sa balaod kay anaa man sa ilang huna-huna ang kahadlok nga basin og mapilde sila sa umaabot nga eleksyon mao nga kon mahimo, amigohon ang tanang tawo.
* * *
Walay uwan hangtod kagahapon sa hapon apan gisuspenso ni Mayor Rama ang klase sa publiko nga elementarya ug high schools dinhi sa dakbayan sa Sugbo.
Sige na lang, mas maayo man ang pagpangandam kay sa magkalisud-lisod ang kabataan sa ilang pagpauli. Nakita man gud sa radar nga kusog kaayo nga uwan ang nagsingabot sa Sugbo kagahapon sa hapon.
Ang nindot gani nga kon magsige ang uwan-uwan karong buntag dili lang usa magklase kay lisud kaayo tawon ang pag-adto sa mga tinun-an, ilabi na kadtong walay mga sakyanan.