Butch Francisco at Leo Katigbak, ilalahad ang kanilang ‘Best 10 Bets’ sa showbiz

Nagbabalik ang batikang TV host na si Butch Francisco kasama ngayon ang film preservation advocate na si Leo Katigbak para sa mainit na showbiz chikahan sa bagong talk show ng FYE na Best 10 Bets na magsisimula nang ipalabas sa Enero 6 (Sabado), 7 p.m. sa FYE YouTube channel at Spotify.

Tampok sa 30-minute countdown show ang Top 10 list mula sa mundo ng showbiz at pop culture.

Si Butch na batikang entertainment journalist at nakilala sa mga programang Showbiz Lingo ng ABS-CBN at Startalk ng GMA ang maglalahad ng kanyang Top 10 picks para sa napiling topic kada episode.

Sasamahan naman siya ni Leo, ang ABS-CBN Film Restoration head na nasa likod ng Sagip Pelikula advocacy, para suportahan at i-challenge ang mga napili ni Butch at magbigay rin ng kanyang sariling opinyon at showbiz trivia.

Para sa unang episode (Enero 6), pag-uusapan nila ang Best Actresses of the Modern Era. Tututok naman sila sa Best MMFF Movies of all time sa susunod na episode na ipapalabas sa Enero 13.

Pagdedebatehan din ng mga Best 10 Bets host ang kanilang top Love Teams of All Time, Greatest Love Stories at Breakups, at marami pang iba sa mga darating na episode nito.

Simula naman sa episode 4 ng programa, sasamahan sina Butch at Leo ng TikTok star na si Gandang Morenx na may mahigit 4.7 million followers sa social media.

Abangan ang Best 10 Bets sa FYE YouTube channel at Spotify tuwing Sabado simula Enero 6, 7 p.m.