Mga pambato sa nasud andam na

Duha ka mga  Sugbuanon  ang andam na sa paghatag og dugang dungog  sa nasud kun maghisgot og natad sa indigay.

Si Wilma Laude Zamora, usa ka Cebuana nga negosyante nga nailhan usab iyang pagkamatinabangon  maoy opisyal nga representante sa Pilipinas alang sa Mrs. Icon World 2023, samtang si Myrrick Jorell Arong, usa ka tourism student maoy morepresentar sa nasud sa Mister Icon World 2023  nga ipahigayon sa Mumbai, India karong  Hunyo 8, 2023.

Usa usab ka public servant si Zamora sanglit nangalagad kini  isip  bise mayor kaniadto  sa Tabuelan.

Usa sa gikabisihan ni Zamora mao ang pagtabang sa mga inbidwal nga nikuha og  adbokasiya .

Sa pagkakaron, malampuson niyang natabangan sa pagkab-ot sa ilang mga pangandoy  ang ang labing menos 20 ka mga abogado .

Adunay kasinatian si Zamora sa pagsalmot kaniadto sa Queen of Tabuelan 1997.

Sila si Malayka Yamas ug Roy Tizon maoy naghimo sa iyang national costume ug gown.

Sa laing bahin, si Arong kinsa  bag-o lang sa kalibutan sa indigay  , madasigong midawat sa hagit sa pagrepresentar sa Pilipinas.

Lumad nga taga dakbayan sa Lapu-Lapu, tourism student  sa University of Cebu Lapu-Lapu - Mandaue (UCLM) si Arong, ug nangandoy nga mahimong flight attendant.

Makauban nila ni Zamora ug Arong sa pagtikang sa India mao si Sheila Pataña nga mao usab ang morepresentar sa nasud alang sa Miss Icon World 2023.