Mr. & Mrs. Nacino

Gikasal na niadtong Biyernes ang Kapuso star nga si Rocco Nacino ug ang sikat nga kanhi libero sa Creamline nga si Melissa Gohing. Taod-taod sab sila nga magkarelasyon hangtud nga nisampot gyud sila sa altar sa kaminyuon.

Contract signing

Nipirma og management contract sa Viva Artist Agency ang beteranang aktres nga kaliwat og taga Cebu nga si Irma Adlawan. Samtang ni-renew sab sa iyang kontrata ang sa maong agency ang singer, piloto ug army reservist nga si Ronnie Liang. Gipaabot nga mas makita na si Irma sa mga pelikula ug TV shows sa Viva puhon, samtang ang pagkanta ang focus ni Ronnie.

Mahinayon gyud

Mahinayon na gyud ang Bb. Pilipinas human nadelatar gumikan sa pandemic. Gitakda sa Bb. Pilipinas Charities Inc. ang coronation night karong April 17, 2021. Niadtong nilabay nga adlaw gibandera na sa BPCI ang national costume competition nga gisalmutan sa 40 ka mga kandidata. Bb. Pilipinas-International crown na lang ang labing taas nga titulo nga ilogan human nibiya na ang Universe franchise ug nilusad sa labing unang Miss Universe Philippines pageant sa nilabay nga tuig diin si Miss Iloilo City Rabiya Mateo ang na-rayna.