“Pardo to the World!”

CEBU, Philippines – Kini maoy tema sa gidumo’g ug gikahinaman nga kompetisyon sa mga transgender sa south, ang Queen of Pardo 2018.

Pagsugod pa lamang sa maong kompetisyon, nahugyaw na ang tanang misaksi sa international costumes sa matag kandidata nga nagrepresentar sa mga nagkadaiyang nasud sa kalibutan.

Suma total, 14  ka mga kandidata maoy nagtigi nga naggikan sa mga nagkadaiyang dapit  Pardo.

Nasakmit ang Miss International Costume award ni Miss South Africa Jamaica Mendoza   tungod sa makabuak niyang mugna.

Nagbitbit siyag og bata sa entablado dungan sa pag guyod sa tulo ka mga kanding nga matud pa maoy haum nga mosalamin sa nasud nga iyang girepresentar.

Ang maong kahigayunan maoy usa sa miukay og maayo sa publiko.

Pag-abot sa swimwear portion, masaypan gyud nga tinuod nga mga babaye ang mga kandidata sanglit sa porma ug rampa pa lang nila, pak na pak sila sa ilang performances.

Apan di sama sa ordinaryong evening gown competition, mirampa ang mga transgender candidates atol sa maong segment sul -ob ang ilang biste nga mga wedding gown.

Daw sa gibayaw ang mga kandidata sa langit ug sa altar sa kaminyuon sa maong mugna sa kompetisyon nga maoy nakapanganga sab sa kadaghanang misaksi niini.

Gikan sa 14, nahimo na lamang lima ang mga kandidata nga maoy nagtigi  sa final question and answer portion.

Matag usa niining mga kandidata nga nalakip sa top five mipakita gyud sa ilang tagsa tagsa ka mga labuk sa gathanay ug tinubagay.

Ug tuod man, gitapos ang maong kagabhiun pinaagi sa pagproklama ug pagkorona sa labing bag-ong Queen of Pardo.

Ang migawas nga mananaog mao silang Janna Fernan sa Brazil nga gikoronahan isip Queen of Pardo Universe; Haycee Nacua sa Malaysia  maoy Queen of Pardo World; Dayne Vequizo sa Thailand maoy napili nga  Queen of Pardo International; ug ang mga runner- up mao silang Jamaica Mendoza ug Shandel Catalan.

Gikalipay og maayo sa  Kapitan sa Poblacion Pardo nga si Manolita “Litang” Abarquez ang pagmalampuson sa maong kalihukan sa iyang barangay.

Giangkon sab niya nga dako ang iyang kalipay nga natuman  ang maong kalihukan sa iyang barangay sanglit siya, usa ka self-confessed lesbian baranggay Captain.

“Ako sad mismo nitabang ko ani’g pamanday sa entablado. Trabahong panglalaki arun kamo sab mga kandidata nindot ang inyung pasohan karong gabhiuna. Nagmapasalamatun ko sa tanang misuporta niining maong kalihukan kung diin ako, isip usa ka lesbian, apil sab niini,” matud pa ni Litang.