Ai-Ai ug Ex-Battalion nagkasumpaki?

CEBU, Philippines — Nikatap ang hungihong nga nagkasumpaki ang grupong Ex-Battalion ug ang manager niini nga si Ai-Ai delas Alas.

Dili pa lang dugay,   nag-post sa Instagram ang komedyanteng aktres  nga mopaubos una siya og leave of absence  isip manager sa maong grupo.

“Effective June 4, 2018, I, together with Ms. Ma. Lourdes Gonzales, will be taking a month-long leave of absence as talent manager and road manager of Ex-Battalion. Should you wish to engage their services for your events, please contact James Samonte, the most senior member of the group thru their official Facebook page or Instagram account.Thank you," post pa ni Ai-Ai.

Wala gitataw sa comedy queen kung unsay rason sa iyang pag-leave isip manager sa maong grupo. Apan human sa usa ka oras nga nilabay,  gipapas ra sab niini ang nahisgutang post.

Nasayran nga nagsagunson og maayo ang projects sa Ex-Battalion human gihuptan ni Ai-Ai ang career sa maong grupo nga maoy nagpasikat sa kanta nga Hayaan Mo Sila.