Sel confidence

Baga’g nawong? Walay uwaw? Mukaon og microphone? Hahaha mao ni pasabot sa self- confidence? Bitaw mahugyaw gyud ta no og mga tawo nga maayo kaayong mutabi, dili mangurog kun muatubang og daghang tawo, ug daw walay gikahadlokan. Apan duna say mga istorya nga kaihion og paatubangon og daghang tawo, hilantanon kun pahatagon og pakigpulong atubangan sa daghang tawo, o mahadlok ba hinuon kun adunay class reporting. Ka liki! Busa unsa may buhaton aron makabaton kita og self-confidence?

Ang www.iheartintelligence.com sa usa ka artikulo nagbatbat niining musunod nga pamaagi aron matud pa maugmad ang atong self-confidence:

1. Be Realistic—ilailaha ang imong kaugalingon unsay imong abilidad ug unsay dili nimo mabuhat. Kinahanglan nga nakasabot ka unsay imong limitasyon aron dili ka maduslak og maayo sa higayon nga mapakyas ka. Mas maayo sab nga nasayud ka unsay imong kakuwangan aron dili gyud nimo pugson pagkab-ot ang usa ka butang o kahigayonan nga dili gyud diay makaya sa imong abilidad. Di magpatuga-tuga. Dili maggara-gara!

2. Embrace Fear- Ayaw og kahadlok. Normal ra ang mahadlok o makulbaan pero ayaw pagpada ana. Ako bitaw kun mag-host og event, makulbaan pa ko uy bisan pa og kapin 20 ka tuig na ko nga nag-host og bisan unsa na lang—wedding, mall shows, singing contests, beauty pageants. Gani kun di ko makulbaan sa dili pa magsugod ang event, muaksyon hinuon ko og kabalaka kay dili na siya normal nako. Kay makulbaan gud ko, kumbinsido ko nga wala koy angayang buhaton but to do my best.

3.     Understand your failures and accept them—Ang kapakyasan wala nagpasabot og katapusan. Hinunua, nahitabo kini aron paghatag nimo og kahigayonan nga makakat-on ug aron mabuhat nimo ang imong best sa sunod nga higayon nga mag-atubang ka og susamang sitwasyon. Kun napakyas ka, hala pagbangutan diha, ihilak tanan nimong kaguol ug pagkadismaya. Dawata ang kamatuoran nga napakyas ka ug buhata ang tanan aron dili na masubli pa ang maong kapakyasan.

4. Surround yourself with the right people—Yes, palibuti imong kaugalingon og mga tawo nga mga confident ug adunay goal nga mulambo ang ilang kinabuhi sama nimo. Kanang mga tawo nga mubira nimo pataas ug dili maoy muduot nimo paingon sa kapakyasan.

5. Pick your battles—Hinay-hinay, inanay. Ayaw hangupa tanan, ug ayaw pagdahom nga mulampos ka dayon. Kay kun musaka bitaw ka og building mugamit man gyud ka og hagdanan (or elevator), dili man ka maglupad. Buot pasabot, hinay-hinaya pagkab-ot ang imong goal, anam-anam ba, dili dunganon tanan kay maburyong ka ana ug wala gyud hinuon kay mahuman.

Oh La La La Pia….

Mao ni ang official glam shots ni Bb. Pilipinas-Universe Pia Wurtzbach nga atua karon sa Las Vegas alang sa 2015 Miss Universe pageant. Kining maong mga hulagway iya sa sikat ug official photographer nga si Fadil Berisha.

Daghan ang excited gumikan kay matud pa dako gyud og kahigayonan si Pia nga madala sa iyang pagpauli sa Pilipinas ang ikatulo nga Miss Universe crown.