JaDine target sa mga politico

CEBU, Philippines – Aduna’y mga molangsad pagka-presidente ug pagka-senador  ang niduol na karon sa Viva Artist Agency aron himuon nila nga endorsers sila si James Reid ug Nadine Lustre. Wala pa mohatag og hukom niini ang big boss sa Viva nga si Vic del Rosario. Nasayran nga humot kaayo sa publiko  karong panahona ang JaDine gumikan sa seryeng On The Wings of Love sa ABS-CBN.

Nagtinabangay

Gipasigarbo nila ni Lovi Poe ug Heart Evangelista nga wala gyud sila nagsinapaway sa seryeng Beautiful Strangers sa GMA-7. Nagtinabangay ang duha aron mosamot kalig-on ang ilang serye.

Susan kalmado ra

Wala’y plano si Susan Roces nga muluwat og dautan nga pulong ngadto sa iyang pag-umangkon nga si Sheryl Cruz. Dili gusto ang aktres nga modako pa ang isyu. Kahinumduman nga nilenggua si Sheryl nga dili siya uyon sa hukom sa anak ni Susan nga si Sen. Grace Poe nga modagan pagka-presidente sunod tuig.

Glaiza nakahilak

Nakahilak si Glaiza de Castro gumikan sa kalipay human na-sold out ang ticket sa iyang first concert sa Music Museum karong October 3 nga nag-ulohan og Dreams Never End. Misamot pa gyud og hilak ang aktres sa dihang nasayran niya nga kusog ang halin sa  iyang album  nga Synthesis ug giingong nagpahimo sila og dugang kopya niini gumikan kay nahurot na kini sa mga music bar.

Ronnie naapil sa kahig

Usa si Ronnie Liang sa nalipay sa kasikat karon sa kalyeserye nila ni Alden Richards ug Maine Mendoza gumikan kay nisamot ka ilado ang iyang awit nga Ngiti. Kanunay nga magamit ang Ngiti sa pipila ka eksena sa maong kalyeserye.

Empress nanganak na

Gihimugso na sa  Kapuso actress nga si Empress Schuck ang first baby nila sa iyang non-showbiz boyfriend nga si Vino Guingona niadtong Dominggo sa ala una sa hapon sa  St. Luke’s Medical Center.  Ginganlan nila og Athalia  ang maong bata.

Okay ra ni Echo

Wala’y problema alang kang Jericho Rosales nga second choice lang siya sa pelikula nila ni Jennylyn Mercado nga Walang Forever. Kahinumduman nga  gihulipan niya si JM de Guzman sa maong proyekto. Ang labing importante alang kang Echo nga nahaom kaniya ang maong movie project.

Kim nailad kaniadto

Giangkon ni Kim Chiu sa interview niya sa Gandang Gabi Vice nga nakasuway na siya nga giilad siya sa iyang ex-boyfriend ug nidiskarte kini sa laing babaye. Wala kini mopagawas og pangalan apan ang mga himantayon kumbinsido nga si Gerald Anderson maoy iyang gipasabot. Sa dihang nangutana ang host nga si Vice Ganda kung si Gerald ba ang iyang gipasabot, nitubag lang ang aktres og,” Nananahimik na siya ngayon.”

Naputol ang komunikasyon

Gipadayag ni Kakai Bautista nga  gidid-an siya nga mohinabi sa Thai actor nga si Mario Maurer. Wala siya modetalye sa tinud-anay nga rason niini. Kahinumduman nga nagkasuod  sila si Kakai ug Mario gumikan sa pelikulang “Suddenly It’s Magic” niadtong 2012. Bida sa maong pelikula sila si Mario ug Erich Gonzales.

Bryan White mag-concert sa nasud

Kumpirmado na ang pagtikang sa Pilipinas sa international singer nga si Bryan White. Mahitabo kini karong December 1 sa Araneta Coliseum. Si Bryan maoy nagpasikat sa awit nga “God Gave Me You” nga kanunay nga madunggan sa AlDub kalyeserye sa Eat Bulaga.