Jen wala mopatim-aw

CEBU, Philippines – Wala motambong si Jennylyn Mercado sa kasal sa kanhi niya hinigugma nga si  Patrick Garcia niadtong Sabado sa Blue Leaf Filipinas. Wala gituman ni Jen ang saad niya nga motambong sa kasal ni  Patrick ug Nicole. Wala pa hinuon mohatag og rason si Jen sa wala niya pagtambong. Ang anak lang ni Jen nga si Alex Jazz uban sa apohan niini maoy nitambong sa seremonya.

Edu todo diet

Gipadayag ni Edu Manzano nga seryoso siya sa iyang pag-diet hinungdan nga bata pa gyud ang iyang hitsura. Suma pa ni Edu nga dili siya magpalabi bisan pa man sa paborito niya nga mga pagkaon.

Kondisyon

Gibutyag ni Rey Pamaran nga pasakaan gyud niya og kaso si Melissa Mendez kinsa misagpa kaniya sulod sa eroplano niadtong Biyernes. Suma pa ni Rey nga dili niya idayon ang kaso kung mo-isyu og public apology si Melissa.

One Direction gihilakan

Ubay-ubay ka fans sa One Direction ang emosyonal sa paglugwa sa ilang idolo atol  sa concert sa maong grupo sa miaging gabii sa Mall of Asia Arena concert ground.  Giingong nibunok  ang kusog nga ulan apan wala gihapon kini makapugong sa kasadya sa maong concert.

Himoong matag-adlaw

Kung mo-click ang programang Wowowin nga  malantawan matag Domingo sa GMA-7 sugod karong April 26 , intresado ang host niini nga si Willie Revillame nga himoong matag adlaw ang maong show.

Nagkita og balik

Nagkita sila si  Charice ug ang international composer and record producer nga si  David Foster didto sa  Singapore dili pa lang dugay. Kanhi mentor ni Charice si David busa gikalipay og maayo sa singer ang subli nila nga panagkita. Tua si David sa Singapore gumikan kay usa kini sa mga hurado sa “Asia’s Got Talent.”

Banggiitang direktor

Masaligon sila si James Reid ug Nadine Lustre nga magmalampuson ang umaabot nga serye nila sa ABS-CBN nga On the Wings of Love gumikan kay banggiitan ang direktor nila niini. Si  Dan Villegas  maoy direktor sa maong serye kinsa mao usab ang direktor kaniadto sa pelikulang English Only, Please nga gibidahan nila ni Jennylyn Mercado ug Derek Ramsay.

Rocco nakahilak sa regalo

Nakahilak si  Rocco Nacino sa nadawat niya nga birthday gift gikan sa iyang girlfriend nga si Lovi Poe. Nakadawat siya og iPhone ug  Bomberg wristwatch.“I hate you for bri­nging me to tears with your sweet gifts but thank you for making me extra happy tonight my love, with my wonderful gifts to enjoy my birthday salubong, a gift I want, and need. Thank you for this, but when it comes to a want and a need, it will always be you.I love you babe!,” mensahe pa ni Rocco ngadto kang Lovi.

Buboy naglaom

Nagmalaumon ang kanhi child star nga si Buboy Villar nga mabanhaw ang iyang showbiz career ug dako kaayo ang matabang sa pagdala niya isip batang Manny Pacquiao sa pelikulang Kid Kulafu.

Shine Pilipinas

Ang “Forevermore” stars nga sila si  Enrique Gil ug Liza Soberano maoy nagkanta sa  summer station ID sa ABS-CBN nga nag-ulohan og “Shine Pilipinas.” Sa  official Instagram account ni Enrique , gi-post sa aktor ang hulagway nila ni Liza samtang nag-record sila sa maong kanta.

Nora sa Hinulid

Si Nora Aunor maoy bida sa  indie film  nga Hinulid. Himoon ang pipila ka mga eksena niini didto sa  Bicol. Nagbaha ang mga indie film nga pagabuhaton ni Nora karong tuiga.

Moral support

Mitambong si Bianca Umali sa graduation sa iyang ka-loveteam nga si  Miguel Tanfelix niadtong Sabado. Migradwar si Miguel sa high school ug wala niya damha ang pagpatim-aw ni Bianca sa maong espesyal nga adlaw.

Roel Cruz dunay cancer

Naghambin og stage four colon cancer ang beteranong singer nga si  Roel Cruz. Siya maoy nagpasikat sa mga awit sama sa “Napakasakit Kuya Eddie” ug  “Baleleng.”

Grabe ang pagsidlak

Naghinam-hinam na ang 17 anyos nga si  Julian Trono  sa mga umaabot niya nga proyekto. Misidlak ang career karon ni Julian ug wala niya damha nga mahimo siya nga ultimate Filipino-Korean performer.  

Allen nakadaug sa Ireland

Si Allen Dizon ang napili nga Best Actor sa bag-ohay lang nga 3rd Silk Road Film Festival nga gipahigayon sa Dublin, Ireland.

Nataypan sa mga hurado ang maayong pag-arte ni Allen sa pelikulang Magkakabaung (The Coffin Maker).

Gipildi niya  sa maong kategoriya ang  mga banggiitang aktor sa ubang nasud nga naglangkob nila ni  Gerard Depardieu (The Voice of Steppe),  Sofi Jikan (  Men Who Save The World) , Iwase Ryo (  Midsummers Fantasia), ug  Mohammad Javad Ezzati (Angels Descend Together).

Ang pagkapili ni Allen pagka-best actor sa  Silk Road Film Festival maoy ikatulo nga  international best actor award nga nadawat niya  alang sa pelikulang Magkakabaung.

Kahinumduman nga siya maoy giilang best actor sa  9thHarlem International Film Festival didto sa  New York . Nakadawat gihapon siya sa susama nga pasidungog sa  Hanoi International Film Festival didto sa  Vietnam.

Ang  Magkakabaung pud ang napili nga  Best Film sa 3rd Silk Road Film Festival. Si Jason Paul Laxamana maoy  direktor sa  Magkakabaung.  (Sanden J. Anadia)

Vice ug Daniel nagtingog na

Malipayong gipahibalo ni Vice Ganda nga nagtingog na sila ni Daniel Padilla ug ang aktor gyud mismo maoy una nga nitagad kaniya.

Suma pa ni Vice gamay ra kaayo ang rason sa bugnaw nila nga pagtinagdanay sa miaging buwan kung diin nagsugod kini sa dihang nangreklamo ang Kathniel fans gumikan kay gamay ra kaayo ang gihatag nga oras sa ilang idolo sa dihang gipa-guest  kini sa Gandang Gabi Vice.

“Ganon lang naman kami, lagi naman kaming nagtatampuhan niyan. Pero wala lang, walang artehan kapag nagkita kami super okay kaming dalawa,” suma pa ni Vice.