Christina Aguilera nagsabak

CEBU, Philippines - Usa ka semana human gianunsyo  ang engagement,  gisumsuman na usab karon ang taho nga nagsabak ang  Grammy Award-winner nga si Christina Aguilera.

Giingong usa ka tinubdan nga suod sa singer   nga mikumpirmar nga nagsabak si Christina  alang sa umaabot nga anak nila ni Matthew Rutler.

Kahinumduman nga niadtong  Valentine's Day,  gibutyag sa  33-anyos nga  singer nga kaslunon na siya sa iyang boyfriend nga usa ka  production assistant.

Sa Iyang  Twitter account, mi-post si Christina  og hulagway sa mga kamot nila ni Matthew  nga nagkinuptanay  ug dayag kaayo ang  engagement ring nga ilang gisuot. Aduna kini caption nga," He asked and I said......"

Nagkauyab sila si Christina ug Matthew niadtong 2010 ug padayon nga nagkalig-on ang dagan sa ilang relasyon hinungdan nga nakahukom sila nga magpakasal.

Lakip sa  hit songs ni Christina naglangkob sa  "Dirty," "Genie in a Bottle," "Hurt," "Beautiful," "Fighter," ug "Come On Over," .