Sophia Andres Up Close

CEBU, Philippines - Mas maanyag sa personal, makamaong makighugoyhugoy sa entertainment press bisan sa linghud pa niya nga pangidaron ug disidido nga musikat. Siya mao ang 14-anyos nga si Sophia Andres, “igsuon” ni Mikay sa toprating teleserye nga Princess and I sa ABS-CBN. Si Sophia, maoy kauban ni John Medina, cast sa bag-o pa lamang nahuman nga Walang Hanggan isip celebrity guests sa Gaisano Main ug Country Mall kagabii sa ilang Halloween Sale ug sa paglusad sa A Million Thanks raffle promo.

Sa usa ka lamiang paniudto diha sa Lighthouse Restaurant sa Mango Avenue kagahapon, dali nga nauyonan si Sophia sa mga sakop sa E-Group (Cebu Entertainment Group) gumikan kay gaan  kaayo siyang ikasulti, walay “attitude problem,” walay gikahadlukang pangutana kay wala may tinaguang makadaot niya, tabian ug alegre ikaistorya.

Tres anyos lamang siya dihang nagsugod isip commercial model para sa Sta. Lucia Mall sa kaulohan nga gipanag-iya matud pa sa iyang lolo. Ang iyang papa nagtrabaho sa marketing department sa maong tindahan hangtud karon. Sukad sa una niyang modeling assignment nagsunod-sunod na ang iyang mga proyekto alang sa nagkadaiyang mga kompaniya ug produkto. Sais anyos matud pa siya dihang nakauban niya si Judy Ann Santos sa usa ka commercial para sa gatas. Niadtong nag-edad siya og nuwebe anyos, nagkaabot sila ni Kathryn ug Julia Montes sa audition para sa fastfood chain commercial. Siya maoy nakuha nga talent. Hi and hello lamang sila niadtong mga panahona apan karon managhigala na sila gumikan sa teleserye diin bida si Kathryn.

Suod sila nga managhigala ni Michelle Vito, ang kontrabida sa  pantaserye nga Aryana, sulod na sa walo ka tuig. Wala pa gyud unta siya’y plano nga mag-showbiz gumikan kay buot ang iyang mga ginikanan nga humanon niya ang iyang pagtuon, bisan og kaniadto pa may mga offers na siya gikan sa ABS-CBN ug GMA-7. Sa milabay nga tuig, gigalgal siya sa iyang iyaan nga mutekang sila sa Star Magic para sa casting, ug didto nakuha dayon siya para sa Princess and I. Hinungdan nga misugot na lamang ang iyang mga ginikanan basta kay humanon gyud niya ang iyang pagtuon. Ganahan matud pa siya og fashion designing, pero gusto sa iyang papa nga lisud nga kurso ang iyang kuhaon sama sa medicine. High school sophomore siya sa Montessori school sa Pasig, diin naningkamot gyud siya sa iyang mga assignments gumikan kay gikan sa taping diretso na siya sa tunghaan diin hatagan matud pa siya og special exams. Makalima matud pa siya nagbalik-balik og audition para sa Princess & I, diin wala gyud siya’y ideya nga sa ngadto-ngadto ang iyang character ug kang Kahlil Ramos maoy magpares kay sila mang duruha ang nauyonan sa publiko.  “Madaldal siya, weirdo kasi minsan tahimik minsan maingay tas lagi siyang nakawacky face, we talk na man but not always,” hulagway pa niya sa ilang relasyon ni Kahlil sa set sa Princess & I. Pero siya maoy leading lady ni Kahlil sa music video sa kanta niining Sana. Ug plano matud pa sa ABS-CBN nga ilusad ang ilang loveteam sa ilang follow-up project. Nasayran nga gikinahanglan na unta siya ug si Kahlil para sa Apoy Sa Dagat teleserye nga pagabituonan nila ni Piolo Pascual, Angelica Panganiban, ug Diether Ocampo, apan dili pa siya mahimong musugod og taping gumikan kay extended man ang Princess and I hangtud sunod tuig.

Sa pangidaron niya nga 14 anyos, may gitas-on siya nga 5’3. Dihang giingnan nga mutubo pa siya ug mamahimo na unya siya nga musalmot og beauty pageants, lingo-lingo ang tubag ni Sophia, kay modeling ra matud pa iyang gusto. Upat sila ka managsuon, 18 anyos ang ilang kamaguwangan nga engineering student, 17 years old ang iyang ate nga communication arts ang kurso ug sais anyos ang ilang kamanghuran nga “special child” niya pa. Co-manage si Sophia sa Star Magic ug sa Powercast Modeling Agency. Managsama sila ni Michelle Vito nga talent sa nahisgutang modeling agency, ug nagkaila sila sa iyang co-manager nga si Egay Cubelo pinaagi ni Michelle.  Gawas sa acting, makamao pud matud pa siya musayaw. Gani suma pa ni Egay , “para siyang Maja Salvador in the making kung sumayaw.” Sila si Gerald Anderson ug Enrique Gil ang iyang mga crush sa showbiz. Pero mikomedya siya nga, “Kasi ayaw umalis ni mommy kaya walang makaligaw.” (BANAT NEWS)