Go Go Go Morisette!

CEBU, Philippines - Naghinamhinam na ang usa sa duha ka pambato sa Cebu nga si Morisette Amon alang sa grandfinals karong Domingo sa talent show sa TV 5 nga Star Factor.

Si Morisette nasulod sa Final 4 uban nila ni Eula Caballero (Cebu), Christian Samson (Bulacan), ug Ritz Alzul (Pampanga).

“Nagpasalamat gyud ko og maayo nga nasulod ko sa Top 4,   salamat kaayo sa akong pamilya , mga friends nako, ug sa tanan mga taga-Cebu nga ni-support nako,” matud pa ni Morisette sa dihang nahinabi sa Banat Hugyaw sa miaging adlaw.

Busy na si Morissette karon sa mga rehearsals isip pagpangandam sa   himuon nga grandfinals sa Ynares Sports Arena sa Pasig karong Domingo.

Giangkon niya nga wala siya magdahom nga masulod siya sa Final 4 gumikan kay lig-on kasagaran ang ubang finalists.

“Hinaut nga sunod-sunod na gyud ang suwerte nga maabot sa akong kaugalingon. Ang importante nga duna gyud ta’y pagsalig sa atong self,” dugang pa ni Morisette.

Samtang ang iyang inahan nga si Analy mipadayag dinhi sa Banat Hugyaw nga way hunong ang iyang pag-ampo busa mao kini ang iyang giisip nga usa sa mga instrumento nga nalakip gyud sa Final 4 ang iyang anak.

“Kontento nako nga nasulod sa Top 4 ang akong anak , bale bunos na lang kung mahimo nga grand winner si Morisette. Salamat kaayo sa tanang nisuporta sa akong anak,” suma pa ni Analy.

Dugang pa niya nga gumikan sa maong show , mas napalapdan ni Morissette ang pagpaambit sa iyang talento ngadto sa publiko.

Bisan puros lig-on ang nasulod sa Final 4 , nagpabilin nga maglutaw ang kabongga sa talento ni Morissete gumikan kay dili gyud kabintahaan ang iyang talento sa pag-awit sa higayon nga mutuntong kini sa entablado.

Si Morisette lumad nga taga Mambaling dakbayan sa Sugbo ug tinun-an sa Asian College of Technology-Bulacao.