Miggamit ba og steroid si Marco?

Tungod lagi kay si Carlo Aquino, usa man gyod sa akong mga paboritong artista gawas nilang Ricky Davao, Christopher de Leon, ug John Lloyd Cruz, sukad nako siya makita sa pelikulang “Kokey” nga gibitoonan ni Ricky Davao [siyempre mitan-aw ko sa maong pelikula tungod ni Ricky, di ba?], namugos kong Julian Tancawan alyas Japan nga motekang ko sa show nilang Carlo diin kauban niya sila si Valerie Concepcion ug Marco Alcaraz diha sa Gaisano Main Food Square, total anha man gyod ko manihapon atong tungora, kay nangompra man si Christian Tariman og mga borloloy diha sa Colon atol atong Pasko sa Colon, ug nagsabot man mi’s Christian nga sa Gaisano Main Food Square na lang mi manihapon. Pero wa na diay kinahanglana ang permiso gikan ni Julian alyas Japan kay gipasulod man ko dayon sa manager sa Alcorea Dance Idols nga si Jack Rallos nga, nakaila sad intawon nako nga taga Banat News ug Freeman.

Pila may sugilon, nagka istoryahanay na pod mi’s Carlo ug Valerie Concepcion samtang nag-perform si Marco Alcaraz, uban sa hugyaw sa mga tawo sa dihang gihubo ni Marco ang iyang sinina ug nakita ang dako kaayo niyang lawas. Igo gyod ming nahuman og istoryahanay nilang Carlo ug Valerie, nahuman pod og perform si Marco busa, nagka-istoryahanay na sad mi’s Marco, ug namatikdan nako ang hilabihan ka dako sa iyang bukton. “Dako na man kaayo ka, Marco” ako siyang giingnan. “Bitaw, kuyawan ko’g mosubra,” mitubag siya. “Ayaw palabi’g padako, kay maglisod na unya ang mga director sa pagpangita og leading lady para nimo, or mosangko nalang unya ka sa pagka supporting actor, maayo raba kang modala. “Gitambagan nako siya.

Sa pagpanamilit nako ni maam Rose ug nananghid kong dili na lang ko mokuyog nila sa pagpangaon ug ngadto na sa Country Mall, kay duna ko’y laing appointment, naghatagay mi’s Marco sa bag-o namong mga numero sa among cellphone, ug miingon siyang mo-text gyod kono ko niya kun unsay ikasulti nako sa iyang acting sa mga umaabot niyang projects. Pero paggawas namo ni Christian, nangutana nako si Christian kun wa ba kaha moggamit og steroid si Marco, kay dako na man kaayo ang bukton. Miasoy man pod god si Christian nga may mitambag niyang paggamiton siya og steroid aron mas monindot kono ang iyang lawas, labi na kay apil siya sa “Body Beautiful” competition nga gipahigayon sa Paseo sa Pebrero 1. Miingon siya, “bahala na pod uroy og dili ko modaog…” Miangkon usab si Greg Lawas nga may pipila gyod ka mga lalaking moggamit og steroid kun moapil sa mga sama niining bangga, ug dako ang iyang pagtoo nga kadaghanan sa mga artistang nindot og lawas, moggamit og steroid.