Diana galit kay Francine

Pinabulaanan ni Francine Prieto na nag-away sila ni Diana Zubiri dahil sa kanya ipinagkatiwala ang dapat na role ni Diana sa Bridal Shower. Hindi raw totoo ang alitan nila dahil nag-uusap naman sila kung nagkikita sila dahil alam ni Diana na walang sulutang nangyari.

Nagkaroon ng problema noon si Diana kay Robbie Tan kaya minabuti ng producer na palitan ang buong cast na kinabibilangan nina Rosanna Roces, Diana Zubiri at Rufa Mae Quinto. Walang revision na ginawa sa naturang pelikula sa pagpasok sa eksena nina Dina Bonnevie, Cherry Pie Picache at Francine Prieto. Nagampanan ng mga ito effectively ang kanilang mga papel.

Sa ngayon ay pinagsasabong talaga sina Francine at Diana dahil iisang klase ang kanilang image, ang pagiging bold star.

"Ang tsika kasi ay ikinagalit ni Diana ang pagpalit ko sa kanya sa Bridal Shower na kung tutuusin, sumunod lang ako sa gusto ng producer. Talent lang po ako at kung anuman ang naging problema ni Diana kay Boss Robbie ay wala na ako roon."– AD