Basurang ikinalat mo, babalik sa ‘yo!
Ang kapal, grabe talaga, nakakapag-init nang husto sa ulo ng marami ang nag-viral video ng mag-ina nawalang habas na itinatapon ang kanilang basura sa baha sa kalsada d’yan sa Brgy. 67 sa Caloocan City noong isang linggo.
Kung anu-ano tuloy ang itinawag sa kanila ng netizen, ‘balasubas’, ‘baboy’ at kung anu-ano pa.
Pero naman kasi matindi ang mga ito, iyong nakaligpit na basura ikinalat pa.
Pinaanod sa hindi naman kalalimang baha sa kalsada kung saan kitang-kita pa na winawalis o itinataboy papalayo sa kanila.
Talagang burara at hindi mo masabi kung anong klaseng tao ang mga ito.
Kung ang kanilang barangay, pasemi-seminar lang ang ipapataw ditong kaparusahan, ang Metropolitan Manila Development Authority (MMDA)hindi sila papalagpasin.
Papanagutin, ayon nga kay MMDA chairman Danilo Lim.
Dapat lang talaga kasi kung paaalpasin hindi magtatanda ang mga ito, dapat masampolan ang ganitong mga tao.
Kaya talaga hindi mareso-resolba ang matinding pagbaha sa bansa dahil sa kawalan ng disiplina ng marami.
May kasabihang basurang itinapon mo babalik sa yo, kaya nga sigaw ng mga netizen ibalik sa bahay ng mag-ina ang mga basura.
Dapat din siguro isailalim ang mga ito sa community service, kung pwede paglinisin ng creek para maramdaman nila kung anong perwisyo ang ginagawa nila sa mga daluyan ng tubig.
Dapat hindi palagpasin ng MMDA at ang barangay huwag namang lalamya-lamya sa pagpapatupad sa mga ordinansa at batas. Ano pa ang silbi kapag ganyan.
- Latest