Mister kinatay ng 2 bayaw
TIAONG, Quezon, Philippines — Hindi na umabot pang buhay sa ospital ang isang mister matapos na pagtulungang gulpihin at pagsasaksakin ng kanyang dalawang bayaw kamakalawa ng hapon sa Sitio Silangan, Barangay Tamisian sa bayang ito.
Nagtamo ng mga saksak sa ibat-ibang parte ng katawan na sanhi ng kanyang kamatayan ang biktimang si Rogelio Perigreno, 34, obrero, samantalang tinutugis na ng mga otoridad ang magkapatid na suspek na sina Noriel at Wilson Pira.
Base sa imbestigasyon, bandang alas-5:00 ng hapon ay nakipag-inuman sa kanilang kapitbahay ang biktima at bayaw na si Noriel.
Nang malasing ang biktima ay tumanggi na siya sa inaalok na tagay pa ng bayaw na si Noriel na ikinagalit ng huli na humantong sa panununtok nito.
Dahil sa nalikhang ingay ay nagising mula sa pagkakatulog si Wilson at agad na bumangon at kumuha ng patalim saka inundayan ng sunud-sunod na saksak ang bayaw saka mabilis na tumakas kasama ang kapatid.
- Latest