Cooker machine sumabog: Empleyado utas!
MANILA, Philippines — Patay ang isang empleyado ng isang chicken processing center matapos na aksidenteng masabugan ng cooker machine na kanyang inaayos sa loob ng pinagtatrabahuhan nito sa Tiaong, Quezon nitong Biyernes ng hapon.
Kinilala ang nasawing biktima na si Renier Braza Caraan, nasa hustong gulang, nagtamo ng matitinding pagkalapnos sa katawan bunga ng sumabog na cooker.
Sa ulat ng CALABARZON Police, naganap ang insidente sa loob ng Rendtek Inc. sa Johannas Chicken Processing Center Inc. sa Brgy. Lagalag ng bayang ito bandang alas-4:20 ng hapon.
Ayon sa pulisya, nakatanggap sila ng tawag sa telepono mula kay Mara Rondera Jusay ng nasabing Chicken Processing Center na iniulat ang insidente.
Base sa inisyal na imbestigasyon, kinukumpuni ng biktima ang nasabing cooker machine nang bigla itong sumabog.
Nagtamo ang biktima ng grabeng pagkasunog at pagkalapnos ng kaniyang balat na bagama’t nagawa pang maisugod sa pagamutan ay idineklarang dead-on-arrival.
- Latest
