10 bayan sa Isabela, apektado ng ASF
SANTIAGO CITY, Isabela, Philippines — Umabot na sa 10 bayan sa lalawigang ito ang apektado ng African Swine Fever (ASF), ayon sa ulat ng Provincial Veterinarian Office kamakalawa.
Ang mga bayan na mahigpit na minomonitor sa kasalukuyan dahil sa kaso ng ASF ay ang mga bayan ng Aurora, Angadanan, Alicia, Burgos, Roxas, Luna, Quirino, Mallig, Echague at bayan ng Gamu.
Ayon kay Provincial Veterinarian officer Belina Barbosa, umabot sa 194 na alagang baboy ang agad na isinailalim sa culling o ibinaon sa lupa sa bayan pa lamang ng Gamu.
Napag-alaman na mabilis ang pagkalat ng kaso ng ASF sa ibang bayan ng Isabela dahil umano sa nakasanayan na pagpapa-aruga o pagkatay at pagtitinda sa mga karne ng baboy sa mga bahay na hindi dumadaan sa mga slaughter house para masuri.
Unang naitala ang muling pagsulpot ng ASF sa lalawigan nitong buwan lamang ng Agosto kung saan mabilis na kumalat sa 10 mga bayan nitong katapusan ng September.
Dahil dito, mahigpit na ipinagbabawal ang pagkatay ng baboy sa kanilang tahanan para hindi na dumami pa ang mga maapektuhan.
Ipinagbabawal din ng LGUs sa lalawigang ito ang pagpasok ng anumang karne ngbaboy o frozen foods sa kanilang nasasakupan, para hindi mahawa ang kanilang mga alagang baboy.
- Latest