67-anyos ginulpi ng kapitbahay dahil sa basura
MANILA, Philippines — Isang 67-anyos na lola ang kasalukuyang inoobserbahan sa pagamutan matapos pagsasapakin ng nakaalitang kapitbahay ng dahil sa basura, kamakalawa ng hapon sa Barangay Zapote 1, Bacoor City, Cavite.
Kinilala ng pulisya ang biktima na nagtamo ng mga sugat at pasa sa mukha at ulo na si Leticia Fornelos residente ng Pasilio Rosas, Brgy. Zapote 1 Bacoor City.
Nahaharap naman sa kasong frustrated homicide ang suspek na si Orlando Lontoc, 42, kapitbahay ng biktima.
Sa ulat, bago naganap ang insidente, ala-1:00 ng hapon ay nasa labas ng kanyang bahay ang biktima nang dumating ang suspek at walang kaabug-abog na itong pinagsasapak sa mukha.
Naawat lamang ang pananapak sa biktima nang sumaklolo ang ilang kapitbahay at inawat ang suspek.
Napag-alaman na bago ang insidente ay nagkaroon ng pagtatalo ang dalawa ng dahil sa away-basura.
Agad ding naaresto ang suspek ng mga barangay opisyal bago dinala sa presinto.
- Latest