Pampasaherong bus binomba: 4 sugatan!
PARANG, Maguindanao, Philippines — Apat katao kabilang ang isang menor-de-edad ang sugatan matapos sumabog ang bomba na itinanim ng ‘di kilalang suspek sa loob ng isang pampasaherong bus habang bumabagtas sa Barangay Making, dito, kahapon ng umaga.
Kinilala ng Parang Police ang mga biktima na sina Feycel Panario Culanag, 40; Expedito Bucay, 45; Benjamin Macacua Wahab, 32, at ang 17-anyos na si John Paul Capuo na pawang ginagamot na sa ospital.
Ayon kay Col. Jibin Bongcayao, Maguindanao Provincial Police director, ang pinasabog na bus ay pag-aari ng Rural Tours Bus Company na nag-o-operate sa rutang Dipolog-Pagadian-Cotabato-General Santos.
Sinabi ni Bongcayao na inaalam na ng mga police probers sa pangunguna ni Lt. Col. Joseph Macatangay ang uri ng bomba na ginamit sa pag-atake sa bus. May naglagay aniya ng eksplosibo sa ilalim ng upuan ng bus.
Sumambulat umano ang bomba habang nagmamaniobra ang driver sa stretch ng Cotabato-Pagadian Highway sa Barangay Making.
Sa inisyal na teorya ng pulisya, ang bomba na iniwan sa bus ay binuo na may blasting contraption na maaaring pasabugin mula sa distansya gamit ang isang mobile phone.
Kumbinsido naman ang mga lokal na opisyales at intelligence officials ng Philippine Army na ang “extortion activities” ng mga terorista o rebelde ang nasa likod ng pag-atake, upang mapuwersa ang may-ari ng bus company na magbigay ng “protection money”.
- Latest