Nene, dalagita patay sa sunog

GUINAYANGAN, Quezon, Philippines — Patay ang isang 4-anyos na babae at kapitbahay na dalagitang nakitulog lang nang masunog ang nasa 38 kabahayan sa Barangay Manggagawa ng bayang ito, kamakalawa ng madaling araw.

Kinilala ng pulisya ang dalawang nasawi na sina Melissa Joy dela Cruz, 4, at Michaela Abellanosa, 15.

Lumalabas sa paunang imbestigasyon ng Guinayangan BFP na nag-umpisa ang sunog sa bahay ng mga Dela Cruz, ala-1:30 ng madaling araw.

Nabatid na madalas umanong sinasamahang matulog ni Abellanosa si Dela Cruz sa kanilang bahay dahil gabi-gabi ay umaalis ang kanyang mga magulang upang kumuha ng isda sa Calauag.

Ayon sa BFP, mabilis na kumalat ang apoy sa mga katabing 37 bahay dahil gawa lamang sa light materials. May teorya ang imbestigador na tulog na ang dalawa nang maganap ang insidente.