7-anyos dedo sa bundol
CANDELARIA, Quezon, Philippines — Hindi na nakasama ng isang 7-anyos na batang lalaki ang kanyang pamilya na salubungin ang Bagong Taon makaraang mabundol at masagasaan ng kotse sa Maharlika Highway sa Barangay Mason Norte, dito kamakalawa ng gabi.
Idineklarang dead-on-arrival sa Candelaria District Hospital dahil sa matinding pinsalang inabot sa katawan at ulo ang biktimang si John Rey Abu-Abu, residente ng Purok 4 ng nasabing barangay.
Ayon sa ulat, dakong alas-11:00 ng gabi habang nasa gilid ng highway ang biktima at nanonood ng nagkakasayahang kapitbahay sa pagsalubong ng Bagong Taon nang biglang tumawid ang bata sa daan para sana makipaglaro sa ibang mga bata subalit hindi nito namalayan ang parating at humahagibis na Suzuki Ertiga na minamaneho ni Kenneth Cala ng Tiaong, Quezon kaya nabundol ang paslit.
Nang tumilapon, nasagasaan pa ang biktima ng kotse.
Nakapiit na sa municipal jail si Cala na nahaharap sa kaukulang kaso.
- Latest