Curfew sa Baguio, niluwagan na
MANILA, Philippines — Niluwagan na ng lokal na pamahalaan ang ipinaiiral na general curfew sa lungsod ng Baguio base sa ipinalabas na executive order (EO) ni Mayor Benjamin Magalong kahapon.
Sa bisa ng EO 159, ginawa nang alas-12 ng hatinggabi hanggang alas-4:00 ng madaling araw ang curfew sa Baguio City mula sa dating alas-9:00 ng gabi hanggang alas-4 ng madaling araw na sinimulang ipatupad noong nakaraang Mayo.
Hindi saklaw ng general curfew ang mga nakatalaga sa frontline services, security services at sa mga pinahihintulutang industriya.
Sinabi ni Magalong na tulad ng dati, ang mga menor-de-edad na 15 pababa at senior citizens na 65 pataas, buntis at may iniindang karamdaman ay hindi pa rin pinapayagang lumabas ng bahay maliban lamang kung ito ay medical emergency, pagtugon sa pangangailangan at trabaho maging ang kumpirmadong konsultasyon sa doktor.
- Latest
