Pastor-contractor sa Bulacan itinumba!

Niratrat habang nasa construction site

MALOLOS CITY, Bulacan , Philippines —  Katarungan ang sigaw ng pamilya ng isang born again pastor at contractor na itinumba ng dalawang ‘di pa nakikilalang riding-in-tandem noong Lunes ng umaga sa Brgy. San Agustin ng nasabing siyudad.

Dead-on-the-spot ang biktima na kinilalang si Ramil Castillo,54-anyos, may-asawa at naninirahan sa Brgy. Maginao, San Rafael, Bulacan.

Kasalukuyang nasa site ang biktima at tinitig­nan ang nakontrata niyang dalawang palapag na bahay na ipinagagawa ng kanyang churchmate na si Ginang Miguela Tanaka, nang siya ay pagbabarilin.

Dakong alas-9:40 ng umaga nang dumating sa site ang dalawang suspek na kapwa naka-bonnet sakay ng motorsiklo at agad na pinadapa ang anim na trabahador ng bahay at saka mabilis na tinungo ng isang suspek ang ikalawang palapag ng bahay kung saan naroroon ang biktima saka pinaulanan ng bala sa iba’t ibang bahagi ng katawan.

Matapos na makitang nakabulagta ang pastor, kinuha ng gunman ang sling bag nito na naglalaman ng mga mahahalagang ID saka sila mabilis na tumakas.