Mister umawat sa away ni misis, kritikal
CABANATUAN CITY, Nueva Ecija, Philippines — Malubha ang isang construction worker makaraang masaksak sa tiyan nang pumagitna sa away ng kanyang misis at kanilang kapitbahay sa Purok Rosal Uno sa Barangay Dicarma sa lungsod na ito, noong Martes ng gabi.
Nilalapatan ng lunas sa Dr. Paulino J. Garcia Memorial Research and Medical Center (PJGMRMC) ang biktimang si Artemio Valenciano, 40-anyos, habang agad naaresto ang suspek na si Juris Cauitan, 35, binata, jobless at kapitbahay ng biktima.
Ayon sa ulat ng pulisya, bandang alas-8:30 ng gabi noong Martes, nanonood ng telebisyon sa kanilang sala ang biktima nang marinig nito ang mainitang pagtatalo ng kanyang misis na si Cherry Lou Valenciano at suspek.
Dahil dito, pumagitna umano ang biktima upang kalmahin ang pagtatalo ng dalawa nang bigla siyang undayan ng saksak sa tiyan ng suspek.
Agad tumakas ang suspek ngunit naaresto rin ng mga pulis na nagpapatrolya habang duguang isinugod sa MV Gallego Cabanatuan City General Hospital ang biktima na kalauna’y inilipat sa PJGMRMC.
- Latest